റബര്‍ ബോര്‍ഡ് റബര്‍ സംഭരിക്കും

കോട്ടയം: റബര്‍ ഉത്പാദക സൊസൈറ്റികളെയും മറ്റ് ഏജന്‍സികളെയും ഉള്‍പ്പെടുത്തി റബര്‍ സംഭരിക്കാന്‍ റബര്‍ ബോര്‍ഡ് തീരുമാനിച്ചു.

ഇതിനായി ബോര്‍ഡ് അഞ്ചംഗ സമിതിയെ രൂപീകരിച്ചു. എസ്. എം. ഡെസള്‍ഫിന്‍ അധ്യക്ഷനായ സമിതിയില്‍ കെ. ജി. രവി (വൈസ് ചെയര്‍മാന്‍), ജേക്കബ് തോമസ്, പി. ലാലാജി ബാബു, പി. ആര്‍. മുരളീധരന്‍ എന്നിവരാണ് അംഗങ്ങള്‍. റബര്‍ ഉത്പാദക കമ്മിഷണര്‍ ഡോ. എ. കെ. കൃഷ്ണകുമാറാണ് സമിതി കണ്‍വീനര്‍.

ഫണ്ട് അനുവദിക്കുന്നത് അടക്കമുള്ള വിഷയങ്ങള്‍ കേന്ദ്ര വാണിജ്യ വകുപ്പുമായി ചര്‍ച്ച ചെയ്തതിനു ശേഷമേ നടപടി ക്രമങ്ങളെ കുറിച്ച് തീരുമാനമുണ്ടാവൂ.

ബോര്‍ഡിലെ ഭൂരിഭാഗം അംഗങ്ങളും കര്‍ഷകര്‍ക്ക് കൂടുതല്‍ സഹായം നല്‍കണമെന്ന ആവശ്യമുയര്‍ത്തി. 25,000 ടണ്‍ റബറെങ്കിലും സംഭരിക്കാന്‍ മുന്നോട്ടുവന്നില്ലെങ്കില്‍ റബര്‍ മേഖലയിലെ പ്രതിസന്ധി തുടരുമെന്നും ചിലര്‍ ചൂണ്ടിക്കാട്ടി. റബര്‍ വ്യാപാരികളുടെ നിലപാട് യോഗത്തില്‍ ചര്‍ച്ച ചെയ്യപ്പെട്ടെങ്കിലും അവരുടെ ആവശ്യങ്ങള്‍ക്ക് അനുകൂലമായ നിലപാട് സ്വീകരിക്കാന്‍ ബോര്‍ഡ് തയ്യാറായില്ല.

റബര്‍ സംഭരിക്കാന്‍ സൊസൈറ്റികള്‍ക്ക് ബാങ്ക് വഴി സഹായമെത്തിക്കുന്നതിന് ബോര്‍ഡ് മുന്‍കൈയെടുക്കും. കേന്ദ്രത്തില്‍ നിന്നുള്ള വായ്പക്കായും റബര്‍ ബോര്‍ഡ് ശ്രമങ്ങള്‍ നടത്തുന്നുണ്ട്.

20,000 ടണ്‍ റബര്‍ കയറ്റുമതി ചെയ്യാന്‍ ആവശ്യമായ നടപടികള്‍ ത്വരിതപ്പെടുത്താന്‍ ബോര്‍ഡ് തീരുമാനിച്ചു.