ലഷ്കാറിന് ലാദന്റെ സഹായമുണ്ടെന്ന്

ലണ്ടന്‍: ജമ്മു കശ്മീരില്‍ പ്രവര്‍ത്തിക്കുന്ന തീവ്രവാദ സംഘടനയായ ലഷ്കാര്‍-എ-തോയിബയ്ക്ക് പാകിസ്ഥാന്‍ സൈനിക ഇന്റലിജന്‍സും സൗദി തീവ്രവാദി ഒസാമ ബിന്‍ ലാദനും സഹായം നല്‍കുന്നതായി ലണ്ടനിലെ ഒരു പ്രമുഖ ഇന്‍സ്റിറ്റ്യൂട്ടിന്റെ പഠനറിപ്പോര്‍ട്ടില്‍ പറയുന്നു.

ഒക്ടോബര്‍ 18 വ്യാഴാഴ്ച പുറത്തിറക്കിയ റിപ്പോര്‍ട്ടിലാണ് ലഷ്കാര്‍-എ-തോയിബയ്ക്ക് സജീവമായ പിന്തുണ ലഭിക്കുന്നുണ്ടെന്ന വിവരം വെളിപ്പെടുത്തിയത്.

ജമ്മു കശ്മീരില്‍ തീവ്രവാദം ദുര്‍ബലമായികൊണ്ടിരിക്കുകയാണെന്നും റിപ്പോര്‍ട്ടില്‍ പറയുന്നു. സംഘര്‍ഷത്തിന്റെ വഴി ഒഴിവാക്കണമെന്ന് ചിന്തിക്കുന്നവര്‍ കശ്മീരില്‍ കൂടികൊണ്ടിരിക്കുകയാണ്. ഇന്ത്യയുമായി ഒരു ധാരണയിലെത്തുന്നതാണ് ശരിയായ പോംവഴിയെന്നാണ് അവര്‍ കരുതുന്നത്.

കശ്മീരിലെ സൈനികപ്രവര്‍ത്തനത്തിനായി നീക്കിവെക്കുന്ന സൈനികച്ചെലവ് കുറക്കുകയാണ് ഇന്ത്യയുടെ ആവശ്യമെന്ന് റിപ്പോര്‍ട്ട് വെളിപ്പെടുത്തുന്നു. ജോര്‍ജ് ബുഷ് അധികാരത്തിലെത്തിയതിനു ശേഷം യുഎസും ഇന്ത്യയും തമ്മിലുള്ള ബന്ധം മെച്ചപ്പെട്ടിട്ടുണ്ട്. യുഎസുമായുള്ള ബന്ധം മെച്ചപ്പെടുത്തുന്നത് ഇന്ത്യക്ക് സാമ്പത്തിക സഹായം ലഭിക്കുന്നതിന് കാരണമായേക്കുമെന്നും റിപ്പോര്‍ട്ട് ചൂണ്ടിക്കാട്ടുന്നു.