ശബരിമലയില്‍ വിപുലമായ സംവിധാനം

ശബരിമല: ഈ മണ്ഡല-മകരവിളക്ക് ദര്‍ശനകാലത്ത് അയ്യപ്പഭക്തര്‍ക്ക് പരമാവധി സൗകര്യങ്ങള്‍ ഒരുക്കാന്‍ നടപടികള്‍ സ്വീകരിച്ചുവരികയാണെന്ന് തിരുവതാംകൂര്‍ ദേവസ്വം ബോര്‍ഡ് പ്രസിഡന്റ് ഡോ. എന്‍. ബാബു വാര്‍ത്താസമ്മേളനത്തില്‍ പറഞ്ഞു. ശബരിമല സന്നിധാനത്തും പമ്പയിലുമാണ് കൂടുതല്‍ സൗകര്യങ്ങള്‍ ഒരുക്കിയിട്ടുള്ളത്.

ചെറിയാനവട്ടത്ത് പണിനടന്നുകൊണ്ടിരിക്കുന്ന മാലിന്യസംസ്കരണപ്ലാന്റിന്റെ ആദ്യഘട്ടം ഉടന്‍ പൂര്‍ത്തിയാക്കും. ശബരിമല സന്നിധാനത്ത് മാലിന്യങ്ങള്‍ ചാരമാക്കാന്‍ സഹായിക്കുന്ന ഇന്‍സിനറേറ്റര്‍ ഉടന്‍ സ്ഥാപിക്കും. ശരംകുത്തി- മരക്കൂട്ടം മേഖലയില്‍ ഭക്തജനങ്ങളുടെ തിരക്ക് നിയന്ത്രിക്കാന്‍ സ്ഥാപിച്ചിട്ടുള്ള ഇരുമ്പ് വേലിക്കെട്ടിന്റെ ഉറപ്പ് കൂട്ടും. അപകടം തടയാന്‍ ഉദ്ദേശിച്ചുകൊണ്ടാണിത്.

ദേവസ്വം ബോര്‍ഡ് പമ്പയില്‍ സ്ഥാപിച്ചിട്ടുള്ള തടയണയുടെ അറ്റകുറ്റപ്പണിനടത്തും. സന്നിധാനത്തെ ഭസ്മക്കുളം കൂടെക്കൂടെ വൃത്തിയാക്കും. പമ്പയിലെയും സന്നിധാനത്തെയും സര്‍ക്കാര്‍ ആശുപത്രികളില്‍ മരുന്നുവാങ്ങാനായി ദേവസ്വം സര്‍ക്കാരിന് 25 ലക്ഷം സംഭാവന നല്കിയിട്ടുണ്ട്. മരക്കൂട്ടത്ത് 30 അടി നീളവും 10 അടി വീതിയുമുള്ള മേല്‍പ്പാലം നിര്‍മ്മിക്കുമെന്നും അദ്ദേഹം പറഞ്ഞു. ദേവസ്വം ബോര്‍ഡ് അംഗങ്ങളായ ചാരുപാറ രവിയും പ്രൊഫ.ഡി. ശശിധരനും പ്രത്യേക കമ്മീഷണര്‍ സി.പി. നായരും സന്നിഹിതരായിരുന്നു.