മുല്ല ഒമറിന്റെ മകന്‍ കൊല്ലപ്പെട്ടു

കാബൂള്‍: താലിബാന്‍ നേതാവ് മുല്ല മുഹമ്മദ് ഒമറിന്റെ മകന്‍ യുഎസ് ബോംബാക്രമണത്തില്‍ കൊല്ലപ്പെട്ടതായി ബിബിസി റിപ്പോര്‍ട്ട് ചെയ്തു. കണ്ഡഹാറില്‍ നടന്ന ബോംബാക്രമണത്തില്‍ പരിക്കേറ്റ ഒമറിന്റെ പത്ത് വയസ്സുകാരനായ മകന്‍ കഴിഞ്ഞ ദിവസമാണ് കൊല്ലപ്പെട്ടതെന്നും ബിബിസി റിപ്പോര്‍ട്ടില്‍ പറയുന്നു.

അബ്ദുള്‍ ബാരി എന്ന അഫ്ഗാന്‍ ഡോക്ടറെ ഉദ്ധരിച്ചുകൊണ്ടാണ് ബിബിസി ഇക്കാര്യം സ്ഥിരീകരിച്ചത്. തന്റെ മകന്റെ ജീവന്‍ രക്ഷിക്കണമെന്ന ഒമറിന്റെ അപേക്ഷയെതുടര്‍ന്ന് നിരവധി മണിക്കൂറുകള്‍ ചികിത്സയ്ക്ക് നീക്കിവച്ചെങ്കിലും ജീവന്‍ രക്ഷിക്കാനായില്ലെന്ന് ഡോക്ടര്‍ പറഞ്ഞതായി ബിബിസി പറയുന്നു.

അടിവയറിനേറ്റ പരിക്കും തുടയെല്ലു പൊട്ടിയതുമാണ് ഒമറിന്റെ മകന്റെ മരണത്തിന് കാരണമായത്. മുല്ല ഒമറിന്റെ അമ്മാവനും പരിക്കേറ്റതായി ഡോക്ടര്‍ സ്ഥിരീകരിച്ചു. പാകിസ്ഥാന്‍ നഗരമായ ക്വെറ്റയ്ക്കടുത്തുള്ള ചമന്‍ അതിര്‍ത്തി കടക്കുന്ന നേരത്താണ് ഡോക്ടര്‍ ബിബിസി ലേഖകനുമായി സംസാരിച്ചതെന്നും ബിബിസി റിപ്പോര്‍ട്ട് പറയുന്നു.