ഇന്ന് സഭ അഞ്ച് മിനിറ്റുകൊണ്ട് പിരിഞ്ഞു

തിരുവനന്തപുരം: ഒക്ടോബര്‍ 23 ചൊവാഴ്ച നാലുമിനിറ്റുകൊണ്ടാണ് നിയമ സഭ പിരിഞ്ഞതെങ്കില്‍ ബുധനാഴ്ച അഞ്ച് മിനിറ്റെടുത്തു ഇതിന്. ഇതിനിടെ നാലു ധനാഭ്യര്‍ത്ഥനകളും പാസാക്കി.

നിയമസഭ ഇന്നത്തേക്ക് സഭ സമ്മേളിച്ച ഉടന്‍ പ്രതിപക്ഷ അംഗങ്ങള്‍ മുദ്രാവാക്യം മുഴക്കി സഭയുടെ നടുത്തളത്തിലേക്ക് ഇറങ്ങിയതോടെയാണ് സ്പീക്കര്‍ സഭ പിരിഞ്ഞതായി അറിയിച്ചത്. തുടര്‍ച്ചയായി അഞ്ചാം ദിവസമാണ് സഭ ബഹളം കാരണം പിരിയുന്നത്.

നാലുമിനിറ്റിനുള്ളിലാണ് നാലു ധനാഭ്യര്‍ത്ഥനകള്‍ ചര്‍ച്ച കൂടാതെ പാസാക്കയത്. ധനമന്ത്രി കെ. ശങ്കരനാരായണനും റവന്യു മന്ത്രി കെ. എം. മാണിയുമാണ് ധനാഭ്യര്‍ത്ഥനകള്‍ അവതരിപ്പിച്ചത്.

മൂന്ന് പ്രതിപക്ഷാംഗങ്ങളുടെ സസ്പെന്‍ഷന്‍ കാര്യത്തില്‍ പ്രതിപക്ഷവും ഭരണപക്ഷവും കടുംപിടുത്തം തുടരുന്നതാണ് ചെവാഴ്ചയും സഭാ നടപടികള്‍ തടസ്സപ്പെടാന്‍ കാരണം. ഒരുതരത്തില്‍ ഇത് സൗകര്യമായി കണക്കാക്കിയിരിക്കയാണ് ഇരുപക്ഷവും എന്ന് തോന്നുന്നു. പ്രതിപക്ഷത്തിന്റെ ആരോപണങ്ങള്‍ക്കൊന്നും മറുപടി പറയേണ്ട ആവശ്യമില്ല, ഉച്ചവരെ സഭയില്‍ ഇരുന്ന് മഷിയുകയും വേണ്ട. എളുപ്പം കാര്യങ്ങള്‍ നടത്താം. ഭരണപക്ഷത്തിന് ധനാഭ്യര്‍ത്ഥനകളും മറ്റും പാസാക്കാന്‍ എളുപ്പം. നഷ്ടം ഖജനാവിന് മാത്രം!