നിയമസഭാപ്രതിസന്ധി തീരുന്നു
തിരുവനന്തപുരം: നിയമസഭയിലെ പ്രതിസന്ധി ഒക്ടോബര് 29 തിങ്കളാഴ്ചയോടെ തീര്ന്നേക്കും.
മുന് സ്പീക്കറും നിയമസഭാംഗവുമായ വര്ക്കല രാധാകൃഷ്ണന് മധ്യസ്ഥനായി നടത്തിയ ചര്ച്ചകളെ തുടര്ന്നാണ് ഇരുപക്ഷവും തമ്മില് വെടിനിര്ത്താന് തീരുമാനമായത്. വര്ക്കല രാധാകൃഷ്ണന് സ്പീക്കര് വക്കം പുരുഷോത്തമനുമായി തയ്യാറാക്കിയ ഒത്തുതീര്പ്പ് ഫോര്മുലയുടെ അടിസ്ഥാനത്തില് തിങ്കളാഴ്ച സഭ സമ്മേളിക്കുമ്പോള് പ്രതിപക്ഷം ചോദ്യോത്തരവേള ബഹിഷ്കരിക്കില്ല.
ശൂന്യവേളയില് പ്രതിപക്ഷ അംഗങ്ങളെ പുറത്താക്കികൊണ്ടുള്ള പ്രമേയം ഭേദഗതികളോടെ സഭയില് വായിക്കുകയും പുറത്താക്കല് പിന്വലിക്കുകയും ചെയ്യും. സഭയില് ജപ്പാന് കുടിവെള്ളപദ്ധതിയുമായി ബന്ധപ്പെട്ട് ചില കാര്യങ്ങള് സഭയിലവതരിപ്പിക്കുമെന്ന പ്രതിപക്ഷ നേതാവിന്റെ പ്രസ്താവന സഭാനടപടികള് തിങ്കളാഴ്ച മുതല് സുഗമമായി മുന്നോട്ടുനീങ്ങുമെന്ന സൂചന നല്കുന്നു.
ദില്ലിയില് സിപിഎം കേന്ദ്രസമിതി യോഗത്തില് പങ്കെടുക്കേണ്ടതുകൊണ്ട് പ്രതിപക്ഷനേതാവ് വി.എസ്. അച്യുതാനന്ദന് തിങ്കളാഴ്ച സഭയില് ഉണ്ടാകില്ല. പകരം കൊടിയേരി ബാലകൃഷ്ണനാവും പ്രതിപക്ഷത്തെ നയിക്കുക.
ഇനിയും സഭാനടപടികള് തടസ്സപ്പെടുന്നതില് കഴമ്പില്ലെന്ന വിശ്വാസത്തിലാണ് പ്രതിപക്ഷം. ഭരണപക്ഷം വര്ക്കലയുടെ ബദല് സംവിധാനം അംഗീകരിക്കാനും കാരണമതാണെന്നറിയുന്നു. തിങ്കളാഴ്ച രാവിലത്തെ സഭാനടപടികള്ക്കു ശേഷം മുഖ്യമന്ത്രിയ്ക്കു ഡല്ഹിക്കു പോകേണ്ടതുണ്ട്.