16 ക്രൈസ്തവരെ കൊലപ്പെടുത്തി
ഇസ്ലാമബാദ്: പാകിസ്ഥാനിലെ കിഴക്കന് പഞ്ചാബ് പ്രവിശ്യയിലെ ഒരു ക്രിസ്ത്യന് പള്ളിയില് പ്രാര്ത്ഥനയില് ഏര്പ്പെട്ടുകൊണ്ടിരുന്നവര്ക്ക് നേരെ അജ്ഞാതര് നടത്തിയ വെടിവെപ്പില് 16 ക്രൈസ്തവര് കൊല്ലപ്പെട്ടു. വെടിയേറ്റവര് ഞായറാഴ്ച പ്രാര്ത്ഥനയിലേര്പ്പെട്ടിരിക്കുകയായിരുന്നു. നിരവധി പേര്ക്ക് പരിക്കേറ്റിട്ടുണ്ട്.
മോട്ടോര്സൈക്കിളില് എത്തിയ ആറു അക്രമികള് ബഹവല്പൂരിലുള്ള പള്ളിയില് പ്രാര്ത്ഥിക്കുന്നവര്ക്ക് നേരെ തുടര്ച്ചയായി നിറയൊഴിക്കുകയായിരുന്നു. കാലിഷ്നിക്കോവ് ഇനത്തില് പെട്ട തോക്കുകളാണ് അക്രമികള് ഉപയോഗിച്ചത്. കൊല നടത്തിയ ശേഷം ആറു പേരും ബൈക്കില് രക്ഷപ്പെടുകയായിരുന്നു.
ഇതുവരെ ആരും കൊലപാതകത്തിന്റെ ഉത്തരവാദിത്വം ഏറ്റെടുത്തിട്ടില്ല. അഫ്ഗാനിസ്ഥാനില് യുഎസ് നടത്തുന്ന ആക്രമണത്തിന് ബദലായി പാകിസ്ഥാനില് ഒരു വര്ഗ്ഗീയ കലാപം നടത്താന് ഉദ്ദേശിച്ചാണോ ഈ കൊലപാതകമെന്ന് വ്യക്തമല്ല.