സഭക്ക് മുന്നില്‍ നിരാഹാര സത്യഗ്രഹം

തിരുവനന്തപുരം: നിയമസഭയില്‍ നിന്ന് സസ്പന്റ് ചെയ്യപ്പെട്ട എം എല്‍ എ മാര്‍ നിയമസഭാ കോംപ്ലക്സിനുള്ളില്‍ അനിശ്ചിതകാല നിരാഹാര നത്യഗ്രഹം തുടങ്ങി.

തുടര്‍ച്ചയായ ഏഴാം ദിവസവും പ്രതിപക്ഷം സഭ സ്തംഭിപ്പിച്ചു. സസ്പന്‍ഷനിലായ എം വി ജയരാജന്‍, രാജു എബ്രഹാം ( സി പി എം) പി എസ് സുപാല്‍ ( സി പി ഐ) എന്നിവരാണ് സഭാ മന്ദിരത്തിനുള്ളില്‍ നിരാഹാര സത്യഗ്രഹം തുടങ്ങിയത്.

ഒക്ടോബര്‍ 30 ചൊവാഴ്ച രാവിലെ 8 30 ന് സഭ സമ്മേളിച്ച ഉടനെ പ്രതിപക്ഷ ഉപ നേതാവ് കൊടിയേരി ബാലകൃഷ്ണന്‍ അംഗങ്ങളുടെ സസ്പന്‍ഷന്‍ പ്രശ്നം ഉന്നയിച്ചുകൊണ്ട് എഴുന്നേറ്റു. എന്നാല്‍ അത് അവഗണിച്ചുകൊണ്ട് സ്പീക്കര്‍ വക്കം പുരുഷോത്തമന്‍ ചോദ്യോത്തരങ്ങളിലേക്ക് കടന്നു.

ഉടന്‍ തന്നെ പ്രതിപക്ഷ അംഗങ്ങള്‍ ബഹളം വച്ച് സഭയുടെ നടുത്തളത്തിലേക്ക് ഇറങ്ങി. തുടര്‍ന്ന് ചോദ്യോത്തരവും ശൂന്യ വേളയും വേണ്ടെന്ന് വച്ച് മറ്റ് നടപടികളിലേക്ക് കടക്കുന്നതായി സ്പീക്കര്‍ വ്യക്തമാക്കി. തുടര്‍ന്ന് കാര്‍ഷീകാദായ നികുതി, വില്‍പ്പന നികുതി എന്നിവയുടെ ഉപധനാഭ്യര്‍ത്ഥനകള്‍ അവതരിപ്പിച്ച് ചര്‍ച്ചയില്ലാതെ പാസാക്കി. ഉടനെ തന്നെ സഭപിരിയുന്നതായി സ്പീക്കര്‍ പ്രഖ്യാപിച്ചു.
നടുത്തളത്തില്‍ ബഹളം വച്ച പ്രതിപക്ഷ അംഗങ്ങള്‍ തുടര്‍ന്ന് പുറത്ത് സഭാ കവാടത്തിനടുത്ത് ധര്‍ണ നടത്തി.