കൊപ്രസംഭരണം ഉടന്‍ തുടങ്ങും: പ്രധാനമന്ത്രി

ദില്ലി: നാഫെഡ് കൊപ്രസംഭരണം അടുത്ത ആഴ്ചയില്‍ തന്നെ തുടങ്ങുമെന്ന് പ്രധാനമന്ത്രി വാജ്പേയി മുഖ്യമന്ത്രി എ.കെ. ആന്റണിയ്ക്ക് ഉറപ്പുനല്കി. നവമ്പര്‍ ഒന്ന് വ്യാഴാഴ്ചയാണ് ആന്റണി പ്രധാനമന്ത്രിയുമായി കൂടിക്കാഴ്ച നടത്തിയത്.

പാമോയിലിന്റെ ഇറക്കുമതി ചുങ്കം 300 ശതമാനം ആക്കണമെന്നും തേയില, കാപ്പി, റബര്‍ ഇറക്കുമതി നിര്‍ത്തിവയ്ക്കണമെന്നും ആന്റണി പ്രധാനമന്ത്രിയോട് ആവശ്യപ്പെട്ടു. സ്വാഭാവിക റബര്‍ ഇറക്കുമതി അടിയന്തരമായി ആറുമാസത്തേക്ക് നിര്‍ത്തിവയ്ക്കണമെന്നും പ്രധാനമന്ത്രിയോട് ആവശ്യപ്പെട്ടിട്ടുണ്ടെന്ന് ആന്റണി വ്യക്തമാക്കി.

വെള്ളപ്പൊക്കദുരിതാശ്വാസത്തിന്റെ കാര്യവും ആന്റണി പ്രധാനമന്ത്രിയുടെ ശ്രദ്ധയില്‍പ്പെടുത്തിയിട്ടുണ്ട്. ഒരു കോടിയിലേറെ രൂപ കേരളത്തിന് വെള്ളപ്പൊക്കക്കെടുതിസഹായമായി നല്കണമെന്ന് പ്രധാനമന്ത്രിയോട് ആന്റണി അഭ്യര്‍ത്ഥിച്ചിട്ടുണ്ട് .