കോഴിക്കോട് സംഭവം അന്വേഷിക്കും: മുഖ്യമന്ത്രി
തിരുവനന്തപുരം: കോഴിക്കോട് ഡിസിസി പ്രസിഡന്റ് വീരാന്കുട്ടിയെ പൊലീസ് മര്ദ്ദിച്ച സംഭവം അന്വേഷിക്കുമെന്ന് മുഖ്യമന്ത്രി ആന്റണി. രണ്ടു ദിവസത്തെ ദില്ലി സന്ദര്ശനത്തിനു ശേഷം നവമ്പര് രണ്ട് വെള്ളിയാഴ്ച തിരുവനന്തപുരം വിമാനത്താവളത്തിലെത്തിയ ആന്റണി വാര്ത്താലേഖകരോട് സംസാരിക്കുകയായിരുന്നു.
സര്ക്കാരിനെ സംബന്ധിച്ച തീരുമാനങ്ങളില് വലിയ പാരമ്പര്യമവകാശപ്പെടുന്ന രാഷ്ട്രീയത്തിലെ കാരണവന്മാര്ക്കും തെറ്റുകള് പറ്റാമെന്ന് മുഖ്യമന്ത്രി തുറന്നടിച്ചു.
നിയമസഭാപ്രശ്നം പരിഹരിക്കുന്നതില് ആന്റണി പരാജയപ്പെട്ടുവെന്ന കോണ്ഗ്രസിലെ മുതിര്ന്ന നേതാവ് കരുണാകരണന്റെ വെളിപ്പെടുത്തലിന് മറുപടി പറയുകയായിരുന്നു മുഖ്യമന്ത്രി.
തന്റെ കടുംപിടുത്തമാണ് നിയമസഭാ നടപടികള് താത്ക്കാലികമായി നിര്ത്തിവയ്ക്കുന്നതിനു കാരണമായതെന്ന ആരോപണത്തേയും അദ്ദേഹം നിഷേധിച്ചു. പ്രതിപക്ഷത്തിന്റെ ട്രേഡ് യൂണിയന് ശൈലിയാണ് പ്രശ്നം രൂക്ഷമാക്കിയത്.
മുഖ്യമന്ത്രിയ്ക്കും മന്ത്രിസഭയ്ക്കും പരിഹരിക്കാന് കഴിയാത്ത പ്രശ്നങ്ങളൊന്നും നിലവിലില്ലെന്ന് അദ്ദേഹം പറഞ്ഞു.