കോഴിക്കോട് ഡിസിസി പ്രസിഡന്റിനെ അറസ്റ് ചെയ്തു

കോഴിക്കോട്: കോഴിക്കോട് ഡിസിസി പ്രസിഡന്റ് വീരാന്‍കുട്ടിയെ നവംബര്‍ ഒന്ന് വ്യാഴാഴ്ച പുലര്‍ച്ചെ അദ്ദേഹം താമസിക്കുന്ന ലോഡ്ജില്‍ നിന്ന് പൊലീസ് അറസ്റ് ചെയ്തു. തുടര്‍ന്ന് കോടതിയില്‍ ഹാജരാക്കിയ അദ്ദേഹത്തെ ജാമ്യത്തില്‍ വിട്ടയച്ചു.

ഇന്ദിരാജ്യോതി പ്രയാണവുമായി ബന്ധപ്പെട്ട് നഗരത്തിലുണ്ടായ അക്രമസംഭവങ്ങളുടെ പേരിലാണ് വീരാന്‍കുട്ടിയെ അറസ്റ് ചെയ്തത്.

വീരാന്‍കുട്ടിയെ യാതൊരു കാരണവുമില്ലാതെ അറസ്റ് ചെയ്തതില്‍ പ്രതിഷേധിച്ച് കോണ്‍ഗ്രസ് പ്രവര്‍ത്തകര്‍ സിറ്റി പൊലീസ് കമ്മിഷണറുടെ ഓഫീസിന് മുന്നില്‍ ധര്‍ണ നടത്തി. മുഖ്യമന്ത്രി എ. കെ. ആന്റണി ദില്ലിയില്‍ നിന്നു തിരിച്ചെത്തിയാലുടന്‍ അദ്ദേഹവുമായി ഇക്കാര്യം സംസാരിക്കുമെന്ന് യുഡിഎഫ് കണ്‍വീനര്‍ ഉമ്മന്‍ചാണ്ടി ഉറപ്പ് നല്‍കിയതിനെ തുടര്‍ന്ന് ധര്‍ണ അവസാനിപ്പിച്ചു.

കമ്മിഷണര്‍ക്കെതിരെ ശിക്ഷാനടപടി സ്വീകരിക്കുന്നതിനെ കുറിച്ച് മുഖ്യമന്ത്രിയുമായി ചര്‍ച്ച ചെയ്യുമെന്ന് കെപിസിസി പ്രസിഡന്റ് കെ. മുരളീധരന്‍ പറഞ്ഞു.