ഉഷ കേസ്: അപവാദപ്രചാരണത്തിന് തെളിവില്ല
കൊച്ചി: കലിക്കറ്റ് സര്വകലാശാലയിലെ ജീവനക്കാരിയായ പി. ഇ. ഉഷയ്ക്കെതിരെ സഹപ്രവര്ത്തകനായ പ്രകാശന് അപവാദപ്രചാരണം നടത്തിയെന്നതിന് തെളിവില്ലെന്ന് സര്വകലാശാലയുടെ പരാതികമ്മിറ്റി ഹൈക്കോടതിയില് നല്കിയ റിപ്പോര്ട്ടില് വ്യക്തമാക്കി.
പതിനൊന്നംഗ സമിതിയിലെ നാല് പേര് റിപ്പോര്ട്ടിലെ നിഗമനങ്ങളോട് വിയോജിപ്പ് രേഖപ്പെടുത്തിയിട്ടുണ്ട്.
ലൈംഗികപീഡനം സംബന്ധിച്ച് വിശാഖ കേസില് സുപ്രിം കോടതി വിധിയില് പറഞ്ഞിട്ടുള്ള ലൈംഗികപീഡനത്തിന്റെ നിര്വചനത്തില് വരുന്നതല്ല ഉഷ സംഭവമെന്ന് റിപ്പോര്ട്ടില് പറയുന്നു. പരാതിക്കാരിയെ ലൈംഗികമായി പീഡിപ്പിക്കാന് പ്രകാശന് ഉദ്ദേശ്യമില്ലാതിരുന്നതുകൊണ്ട് ഇതിനെ ലൈംഗികപീഡനത്തില് ഉള്പ്പെടുത്താനാവില്ല.
സമിതിക്ക് മുന്നില് ഉഷ ഹാജരാക്കിയ അഞ്ച് സാക്ഷികളില് ഒരാള് മാത്രമേ ഉഷയ്ക്കനുകൂലമായി മൊഴി നല്കിയിട്ടുള്ളൂവെന്നും റിപ്പോര്ട്ടില് വ്യക്തമാക്കി.
നേരത്തെ ഉഷയുടെ സത്യാഗ്രഹത്തെ തുടര്ന്ന് പ്രകാശനെ സര്വീസില് നിന്ന് സസ്പെന്റ് ചെയ്തിരുന്നു. സംഭവത്തെ കുറിച്ച് അന്വേഷണം നടത്തിയ വനിതാ കമ്മിഷന് അപവാദ പ്രചാരണം നടന്നിട്ടുണ്ടെന്ന നിഗമനത്തിലാണെത്തിയത്.