ലഷ്കാറിനെ തീവ്രവാദ സംഘടനയായി പ്രഖ്യാപിച്ചേക്കും

ന്യൂയോര്‍ക്ക്: ജമ്മു കശ്മീരില്‍ പ്രവര്‍ത്തിക്കുന്ന ലഷ്കാര്‍-ഇ-തോയിബയും ജയിഷ്-ഇ-മുഹമ്മദും അടക്കം ചില സംഘടനകളെ തീവ്രവാദ സംഘടനകളായി പ്രഖ്യാപിക്കാന്‍ യുഎസ് അറ്റോണി ജനറല്‍ ജോണ്‍ അസ്റോഫ്റ്റ് സ്റേറ്റ് ഡിപ്പാര്‍ട്ട്മെന്റിനോട് ശുപാര്‍ശ ചെയ്തു.

ഈ സംഘടനകളുടെ ഫണ്ട് നേരത്തെ യുഎസ് സര്‍ക്കാര്‍ മരവിപ്പിച്ചിരുന്നു. പാക്കിസ്ഥാന്‍ പ്രസിഡന്റ് പര്‍വേസ് മുഷാറഫ് ബോര്‍ഡ് അംഗമായിട്ടുള്ള റാബിത ട്രസ്റ് ഒഫ് ലാഹോറും തീവ്രവാദി സംഘടനയായി പ്രഖ്യാപിക്കണമെന്ന് ശുപാര്‍ശ ചെയ്യപ്പെട്ട സംഘടനകളില്‍ പെടുന്നു.

ലഷ്കാര്‍-ഇ-തോയിബയെയും ജയിഷ്-ഇ-മുഹമ്മദിനെയും തീവ്രവാദി സംഘടനകളായി പ്രഖ്യാപിക്കണമെന്നത് ഏറെ കാലമായുള്ള ഇന്ത്യയുടെ ആവശ്യമാണ്. ഈ ആവശ്യത്തെ എതിര്‍ത്ത യുഎസ് സ്റേറ്റ് ഡിപ്പാര്‍ട്ട്മെന്റ് ഇവയെ മറ്റ് തീവ്രവാദി സംഘടനകള്‍ എന്ന വിഭാഗത്തിലാണ് പെടുത്തിയിരുന്നത്.

തീവ്രവാദ പ്രവര്‍ത്തനങ്ങളെ പ്രോത്സാഹിപ്പിക്കുന്നുവെന്ന പേരിലാണ് ഈ സംഘടനകളെ തീവ്രവാദ സംഘടനകളായി പ്രഖ്യാപിക്കാന്‍ അറ്റോണി ജനറല്‍ സ്റേറ്റ് സെക്രട്ടറി കോളിന്‍ പവലിനോട് ശുപാര്‍ശ ചെയ്തത്.