ആയിരങ്ങള്‍ ബുദ്ധമതം സ്വീകരിച്ചു

ദില്ലി: അംബേദ്കര്‍ ഭവനില്‍ നവംബര്‍ നാല് ഞായറാഴ്ച നടന്ന ചടങ്ങില്‍ പതിനായിരക്കണക്കിന് ദളിതര്‍ ബുദ്ധമതം സ്വീകരിച്ചു. അഖിലേന്ത്യാ പട്ടിക ജാതി- പട്ടിക വര്‍ഗ കോണ്‍ഫെഡറേഷനാണ് മതപരിവര്‍ത്തന ചടങ്ങിന് മുന്‍കൈയെടുത്തത്.

നേരത്തെ രാംലീല മൈതാനത്ത് നടത്താനിരുന്ന മതപരിവര്‍ത്തന ചടങ്ങിന് പൊലീസ് അനുമതി നിഷേധിച്ചതിനെ തുടര്‍ന്നാണ് അംബേദ്കര്‍ ഭവനിലേക്ക് ചടങ്ങ് മാറ്റിയത്.

അംബേദ്കര്‍ ഭവനില്‍ ഏതാണ്ട് മുപ്പതിനായിരത്തോളം ദളിതരാണ് തടിച്ചുകൂടിയത്. എത്ര പേര്‍ മതപരിവര്‍ത്തനം നടത്തിയെന്ന് വ്യക്തമല്ല. പതിനായിരക്കണക്കിന് ദളിതര്‍ ബുദ്ധമതം സ്വീകരിച്ചെന്ന് അഖിലേന്ത്യാ പട്ടിക ജാതി- പട്ടിക വര്‍ഗ കോണ്‍ഫെഡറേഷന്റെ ഒരു ഭാരവാഹി അറിയിച്ചു.

മതപരിവര്‍ത്തനം ചെയ്തവര്‍ തല മുണ്ഡനം ചെയ്തു. ബുദ്ധമത സന്യാസിമാരാണ് മതപരിവര്‍ത്തനം നടത്തിയത്.

അഖിലേന്ത്യാ പട്ടിക ജാതി- പട്ടിക വര്‍ഗ കോണ്‍ഫെഡറേഷന്‍ ചെയര്‍മാന്‍ രാം രാജും ബുദ്ധമതം സ്വീകരിച്ചു. രാംലീല മൈതാനത്ത് മതപരിവര്‍ത്തന ചടങ്ങ് നടത്തുന്നതിന് അനുമതി നിഷേധിച്ചതിന് അദ്ദേഹം സര്‍ക്കാരിനെ ശക്തമായി വിമര്‍ശിച്ചു. മതപരിവര്‍ത്തനം ചെയ്യാനായെത്തിയ അനേകം ആളുകളെ ദില്ലിയില്‍ പ്രവേശിക്കാന്‍ പൊലീസ് അനുവദിച്ചില്ലെന്ന് രാം രാജ് ആരോപിച്ചു.