അക്രമത്തിന് പിന്നില്‍ കോണ്‍ഗ്രസുകാരെന്ന്

തിരുവനന്തപുരം: കോഴിക്കോട്ടും നെയ്യാറ്റിന്‍കരയിലും ഈയിടെയുണ്ടായ അക്രമത്തിന് പിന്നില്‍ കോണ്‍ഗ്രസുകാരെന്ന് ഐജിമാരുടെ റിപ്പോര്‍ട്ട്. നവമ്പര്‍ അഞ്ച് തിങ്കളാഴ്ച നടന്ന ഉന്നതപൊലീസുദ്യോഗസ്ഥരുടെ യോഗത്തിലാണ് ഉത്തരമേഖലയിലെയും ദക്ഷിണമേഖലയിലെയും ഐജിമാര്‍ റിപ്പോര്‍ട്ട് നല്കിയത്.

മുഖ്യമന്ത്രി പ്രത്യേകമായാണ് പൊലീസുദ്യോഗസ്ഥരുടെ ഈ യോഗം വിളിച്ചുചേര്‍ത്തിരിക്കുന്നത്. കോഴിക്കോട് ഡിസിസി പ്രസിഡന്റ് വീരാന്‍കുട്ടിയെ അറസ്റുചെയ്തതില്‍ പ്രതിഷേധിച്ച് കോണ്‍ഗ്രസുകാര്‍ നടത്തിയ പൊലീസ് സ്റേഷന്‍ മാര്‍ച്ച് കോഴിക്കോട്, ചിറയിന്‍കീഴ്, നെയ്യാറ്റിന്‍കര എന്നിവിടങ്ങളില്‍ അക്രമത്തില്‍ കലാശിച്ചു. ഇതു സംബന്ധിച്ചാണ് ഉത്തര-ദക്ഷിണ മേഖലാ ഐജിമാര്‍ അന്വേഷിച്ച് റിപ്പോര്‍ട്ട് നല്കിയിരിക്കുന്നത്.

കോണ്‍ഗ്രസുകാര്‍ മനപൂര്‍വം അക്രമം നടത്തുകയായിരുന്നുവെന്നാണ് റിപ്പോര്‍ട്ടില്‍ പറയുന്നത് . നെയ്യാറ്റിന്‍കരയിലെ അക്രമസംഭവത്തിന് പിന്നില്‍ മദ്യലോബിയായിരുന്നുവെന്നും ദക്ഷിണമേഖലാ ഐജി ചൂണ്ടിക്കാട്ടുന്നു.