ആന്റണി ഏറ്റവും കപടനായ നേതാവ്: ജാനു
കണ്ണൂര്: കേരളത്തിലെ ഏറ്റവും കപടനായ രാഷ്ട്രീയ നേതാവ് മുഖ്യമന്ത്രി എ. കെ. ആന്റണിയാണെന്ന് ആദിവാസി നേതാവ് സി. കെ. ജാനു പറഞ്ഞു.
ആദിവാസികളോട് കാരുണ്യമുള്ളതുകൊണ്ടല്ല മുഖ്യമന്ത്രി സമരം അവസാനിപ്പിക്കാന് ഒത്തുതീര്പ്പിനൊരുങ്ങിയത്. സമരത്തിന് ലഭിച്ച വ്യാപകമായ ജനപിന്തുണ കണ്ടപ്പോള് മറ്റ് പോംവഴിയില്ലെന്ന് മനസിലാക്കി ആദിവാസികളുടെ ആവശ്യങ്ങള് അംഗീകരിക്കാന് തയ്യാറാവുകയായിരുന്നുവെന്ന് ജാനു പറഞ്ഞു. നവംബര് നാല് ഞായറാഴ്ച വിവിധ ദളിത്-ആദിവാസി സംഘടനകള് കണ്ണൂരില് നല്കിയ സ്വീകരണത്തില് സംസാരിക്കുകയായിരുന്നു ജാനു.
അതേ സമയം സമരത്തിന് തുരങ്കം വെക്കാനാണ് ഇടതുപാര്ട്ടികള് ശ്രമിച്ചത്. ആദിവാസികള് സരമത്തിനിറങ്ങിയപ്പോള് അതിനെതിരെ സിപിഎം നയിച്ച പട്ടിണിജാഥ പരാജയപ്പെട്ടതുമൂലമാണ് സിപിഎം ആദിവാസി സമരത്തിനെതിരെ തിരിഞ്ഞത്. ആദിവാസികളുടെ ഭൂമി തട്ടിപ്പറിച്ചാണ് കഴിഞ്ഞ എല്ഡിഎഫ് സര്ക്കാര് ഭരണം വിട്ടത്.
ആദിവാസികള് ഒരിക്കലും സ്വന്തം ശബ്ദം ഉയര്ത്തരുതെന്നാണ് ഇവിടത്തെ രാഷ്ട്രീയപാര്ട്ടികള് ആഗ്രഹിക്കുന്നത്. ആദിവാസികളുടെ ശബ്ദമെന്തെന്ന് ഭൂമി സമരത്തോടെ അവര് തിരിച്ചറിഞ്ഞുകഴിഞ്ഞെന്ന് ജാനു പറഞ്ഞു.