കോഴിക്കോട് ഹര്ത്താല് പൂര്ണ്ണം
കോഴിക്കോട്: റവന്യൂജില്ലാ യുവജനോത്സവത്തോടനുബന്ധിച്ച് നടന്ന പൊലീസ് ലാത്തിച്ചാര്ജില് പ്രതിഷേധിച്ച് കോഴിക്കോട് ജില്ലയില് യുഡിഎഫും എല്ഡിഎഫും ആഹ്വാനം ചെയ്ത ഹര്ത്താല് പൂര്ണ്ണം. നവമ്പര് ആറ് ചൊവാഴ്ച കടകമ്പോളങ്ങളെല്ലാം അടഞ്ഞുകിടക്കുകയാണ്. ഇതുവരെ അനിഷ്ടസംഭവങ്ങളൊന്നും റിപ്പോര്ട്ട് ചെയ്തിട്ടില്ല.
ഹര്ത്താലിന് ബിജെപിയും പിന്തുണപ്രഖ്യാപിച്ചു. കൊയിലാണ്ടി, വടകര പ്രദേശങ്ങളില് വാഹനഗതാഗതവും തടസ്സപ്പെട്ടു. കോഴിക്കോട് റവന്യുജില്ലാ യുവജനോത്സവത്തോടനുബന്ധിച്ച് നവമ്പര് അഞ്ച് തിങ്കളാഴ്ച രാത്രിയാണ് ഹര്ത്താലിന് കാരണമായ ലാത്തിച്ചാര്ജ്ജ് നടന്നത്.
യുവജനോത്സവവേദിയില് അര്ദ്ധരാത്രിയ്ക്ക് ശേഷം മൈക്ക് ഉപയോഗിക്കുന്നത് പൊലീസ് തടഞ്ഞതാണ് പ്രശ്നങ്ങള്ക്ക് കാരണമായത്. പൊലീസ് നടപടിയില് പ്രതിഷേധിച്ച് ജനങ്ങള് ദേശീയ പാത ഉപരോധിക്കാന് തുടങ്ങി. തുടര്ന്നാണ് പൊലീസ് ജനങ്ങള്ക്ക് നേരെ ലാത്തിവീശിയത്.
അധ്യാപകസംഘടനകളും പൊലീസ് നടപടിയില് പ്രതിഷേധിച്ച് ചൊവാഴ്ച വിദ്യാഭ്യാസ ബന്ദ് ആചരിക്കുകയാണ്.