പൊലീസ് നയം വിനയാവും: കരുണാകരന്‍

തിരുവനന്തപുരം: കോഴിക്കോട് സംഭവത്തില്‍ പൊലീസുകാര്‍ക്കെതിരെ നടപടി സ്വീകരിച്ചില്ലെങ്കില്‍ കൈയുംകെട്ടി നോക്കിയിരിക്കില്ലെന്ന് കെ. കരുണാകരന്‍ പറഞ്ഞു. നവമ്പര്‍ ആറ് ചൊവാഴ്ച തിരുവനന്തപുരത്ത് വാര്‍ത്താസമ്മേളനത്തില്‍ സംസാരിക്കുകയായിരുന്നു കരുണാകരന്‍.

കെപിസിസി പ്രസിഡന്റായിരുന്ന കാലത്ത് തന്റെ സര്‍ക്കാരിനെതിരെ വിമര്‍ശനമുന്നയിച്ച ആളാണ് ആന്റണി. ഇപ്പോള്‍ കെപിസിസി പ്രസിഡന്റ് അണികളെ നിയന്ത്രിക്കണമെന്ന് പറയാന്‍ ആന്റണിക്ക് അവകാശമില്ല. കോണ്‍ഗ്രസ് പ്രവര്‍ത്തകരുടെ വികാരം പ്രകടിപ്പിക്കുക മാത്രമാണ് മുരളീധരന്‍ ചെയ്തത്.

സുപ്രിം കോടതി ഉത്തരവിലെ വ്യവസ്ഥകള്‍ ലംഘിച്ചുകൊണ്ടാണ് വീരാന്‍കുട്ടിയെ പൊലീസ് അറസ്റ് ചെയ്തത്. ഐ ഗ്രൂപ്പുകാരായ മന്ത്രിമാര്‍ പറയുന്നതൊന്നും പൊലീസ് അനുസരിക്കുന്നില്ല.

ആന്റണിയുടെ പൊലീസ് നയം ആന്റണിക്ക് തന്നെ വിനയാവുമെന്ന് കരുണാകരന്‍ ഓര്‍മിപ്പിച്ചു. ആന്റണിയുടെ സൗജന്യമല്ല തങ്ങള്‍ ആവശ്യപ്പെടുന്നത്. നിയമപരമായ നീതിയാണ്.