പൊലീസ് തന്നെ അനുസരിച്ചില്ല: മന്ത്രി ശങ്കരന്
തിരുവനന്തപുരം: കൊയിലാണ്ടിയില് നടന്ന റവന്യു ജില്ലാ കലോത്സവം തടസപ്പെടുത്തരുതെന്ന് താന് ആവശ്യപ്പെട്ടിട്ടും പൊലീസ് അനുസരിച്ചില്ലെന്ന് ആരോഗ്യമന്ത്രി പി.ശങ്കരന്.
ഹൈക്കോടതി നിര്ദേശം പാലിക്കണമെന്നത് ശരിതന്നെ. പക്ഷേ രാത്രി പത്ത് മണിക്ക് ശേഷം മത്സരത്തില് പങ്കെടുക്കാനിരിക്കുന്ന കുട്ടികളുടെ കാര്യം കൂടി പരിഗണിക്കണമെന്ന് താന് പൊലീസിനോട് ആവശ്യപ്പെട്ടു. പക്ഷേ ഈ നിര്ദേശം ചെവിക്കൊള്ളാന് അവര് തയ്യാറായില്ല. ശങ്കരന് പറഞ്ഞു.
ഇതിന്റെ പേരില് താന് രാജിവെക്കാനൊരുങ്ങി എന്ന വാര്ത്ത ശരിയല്ല. പൊലീസ് ഉദ്യോഗസ്ഥരെ സ്ഥലം മാറ്റിയത് കോഴിക്കോടിന് ഗുണമേ ചെയ്യൂ.
കോഴിക്കോട് നടന്ന സംഭവങ്ങള് മുഖ്യമന്ത്രിക്കെതിരെ എ. കെ. ആന്റണിക്കെതിരെ ഐ വിഭാഗം നടത്തിയ ഗൂഢാലോചനയുടെ ഭാഗമാണെന്ന് എം. ഐ. ഷാനവാസ് പറഞ്ഞിട്ടുണ്ടല്ലോയെന്ന് ചൂണ്ടിക്കാട്ടിയപ്പോള് അങ്ങനെയല്ലെന്ന് താന് പറയുന്നില്ല എന്നായിരുന്നു മന്ത്രിയുടെ മറുപടി.