സ്ഥലംമാറ്റം ശിക്ഷാനടപടി : മുരളീധരന്‍

തിരുവനന്തപുരം: ഉത്തരമേഖലാ ഡിഐജിയെയും കോഴിക്കോട് സിറ്റി പൊലീസ് കമ്മീഷണറെയും സ്ഥലംമാറ്റാനുള്ള സര്‍ക്കാര്‍ തീരുമാനം അവര്‍ക്കെതിരായ ശിക്ഷാനടപടിതന്നെയാണെന്ന് കെപിസിസി പ്രസിഡന്റ് കെ. മുരളീധരന്‍. വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

മുഖ്യമന്ത്രിയെന്ന നിലയില്‍ ചില പരിമിതികള്‍ ഉള്ളതുകൊണ്ടാണ് അദ്ദേഹം അക്കാര്യം തുറന്നു പറയാതിരുന്നത്. നേതൃത്വത്തിനെതിരെ പരസ്യപ്രസ്താവന നടത്തിയവര്‍ക്കെതിരെ അച്ചടക്ക നടപടി സ്വീകരിക്കും. കെ.കെ. രാമചന്ദ്രന്‍മാസ്റര്‍ തനിക്കെതിരെ നടത്തിയ പ്രസ്താവനയെപ്പറ്റി എഐസിസി പ്രസിഡന്റിനെ അറിയിച്ചിട്ടുണ്ടെന്നും മുരളീധരന്‍ പറഞ്ഞു.

ചിറ്റൂര്‍ എംഎല്‍എ കെ. അച്യുതനെതിരായ പരാതി അടുത്തുചേരുന്ന കെപിസിസി നിര്‍വാഹകസമിതിയില്‍ ചര്‍ച്ചചെയ്യുമെന്നും അദ്ദേഹം പറഞ്ഞു. കരുണാകരനും ആന്റണിയും കെപിസിസി നിയന്ത്രണത്തിന് പുറത്തുള്ളവരാണെന്നും അവര്‍ക്കെതിരായ പരാതി ഹൈക്കമാന്റിനെയാണ് അറിയിക്കേണ്ടതെന്നും മുരളീധരന്‍ പറഞ്ഞു.