പുതിയ ചലച്ചിത്രസംസ്കാരം കൊണ്ടുവരും: അടൂര്‍

തിരുവനന്തപുരം: കേരളത്തില്‍ പുതിയൊരു ചലച്ചിത്രസംസ്കാരത്തിന് രൂപം നല്കുമെന്ന് ചലച്ചിത്രഅക്കാദമി ചെയര്‍മാനും സംവിധായകനുമായ അടൂര്‍ ഗോപാലകൃഷ്ണന്‍ പറഞ്ഞു. നവമ്പര്‍ 20 ചൊവാഴ്ച കേരളത്തില്‍ നടത്തുന്ന അന്താരാഷ്ട്രചലച്ചിത്രോത്സവത്തിന്റെ സ്വാഗതസംഘരൂപീകരണയോഗത്തിന് ശേഷം വാര്‍ത്താലേഖകരോട് സംസാരിക്കുകയായിരുന്നു അദ്ദേഹം.

ഇക്കുറി ചലച്ചിത്രോത്സവത്തില്‍ മത്സരവിഭാഗം പുന:സംഘടിപ്പിക്കും. മികച്ച ചിത്രത്തിനുള്ള അവാര്‍ഡ് തുക 10ലക്ഷമായി ഉയര്‍ത്തിയിട്ടുണ്ട്. ഇതിനു പുറമെ ഒരു ലക്ഷം രൂപയുടെ പ്രേക്ഷക അവാര്‍ഡ്, രണ്ട് ലക്ഷം രൂപയുടെ സ്പെഷ്യല്‍ ജൂറി അവാര്‍ഡ് എന്നിവ കൂടി നല്കും- അടൂര്‍ വ്യക്തമാക്കി.

2002 മാര്‍ച്ച് 29 മുതല്‍ ഏപ്രില്‍ അഞ്ച് വരെയായിരിക്കും അന്താരാഷ്ട്ര ചലച്ചിത്രോത്സവം നടത്തുകയെന്ന് സാംസ്കാരിക മന്ത്രി ജി. കാര്‍ത്തികേയന്‍ പറഞ്ഞു. ഇക്കുറി ചലച്ചിത്രോത്സവത്തില്‍ പങ്കെടുക്കുന്ന പ്രതിനിധികളില്‍ നിന്നും 100 രൂപ ഫീസ് ഈടാക്കുമെന്നും അദ്ദേഹം പറഞ്ഞു.

നേരത്തെ തൈക്കാട് ഗസ്റ് ഹൗസില്‍ നടന്ന യോഗത്തില്‍ ചലച്ചിത്രോത്സവത്തിനുള്ള സ്വാഗതസംഘം രൂപീകരിച്ചു.