യൂണി. സമിതികളില്‍ ഐടിവിദഗ്ധരെ നിയമിക്കും

തിരുവനന്തപുരം: കേരളത്തിലെ മൂന്നു സര്‍വകലാശാലകളുടെ സെനറ്റ്, സിന്‍ഡിക്കേറ്റ് സമിതികളില്‍ ഐടി വിദഗ്ധരെ നിയമിക്കാന്‍ ബില്‍ കൊണ്ടുവരുന്നു. സര്‍വകലാശാല നിയമ(ഭേദഗതി)ബില്‍ എന്ന പേരിലുള്ള ഈ ബില്‍ നവമ്പര്‍ 20 ചൊവാഴ്ച വിദ്യാഭ്യാസമന്ത്രി നാലകത്ത് സൂപ്പി നിയമസഭയില്‍ അവതരിപ്പിച്ചു.

ബില്‍ സബ്ജക്ട് കമ്മിറ്റിയുടെ പരിഗണനയ്ക്കയച്ചിരിക്കുകയാണ്. ഐടിയ്ക്കു പുറമേ ബയോടെക്നോളജി രംഗത്തെ വിദഗ്ധരെയും സെനറ്റ്, സിന്‍ഡിക്കേറ്റ് സമിതികളില്‍ നിയമിക്കാനും പുതിയ ബില്‍ ശുപാര്‍ശചെയ്യുന്നു. കലിക്കറ്റ്, കേരള, മഹാത്മാഗാന്ധി സര്‍വകലാശാലകളിലെ വിദഗ്ധ സമിതികളിലാണ് ഐടി-ബയോടെക്നോളജി വിദഗ്ധരെ നിയമിക്കുക.

കേരളത്തെ രാജ്യത്തെ പ്രധാന ഐടി കേന്ദ്രമാക്കി മാറ്റാനുള്ള ശ്രമത്തിന്റെ ഭാഗമായാണ് ഈ നീക്കമെന്നും വിദ്യാഭ്യാസമന്ത്രി പറഞ്ഞു. ഐടി രംഗത്ത് ആവശ്യത്തിന് വിദഗ്ധരെ സൃഷ്ടിക്കാന്‍ സ്വകാര്യ മേഖലയുമായി സഹകരിച്ച് കൂടുതല്‍ ഐടി പരിശീലനകേന്ദ്രങ്ങള്‍ ആരംഭിക്കും. വളര്‍ന്നുവരുന്ന മറ്റൊരു വിജ്ഞാനമേഖലയായ ബയോടെക്നോളജിയിലും കേരളം ശ്രദ്ധചെലുത്തുമെന്നും മന്ത്രി പറഞ്ഞു.