പൊലീസ് ഓടിച്ച യുവാവ് കിണറ്റില്‍ വീണ് മരിച്ചു

തൃശൂര്‍: പൊലീസ് ചോദ്യം ചെയ്യാന്‍ വിളിപ്പിച്ച യുവാവിന്റെ ജഡം പൊട്ടക്കിണറ്റില്‍ കണ്ടെത്തി. വെളപ്പായ ബാലന്‍നായരുടെ മകന്‍ മുരളി(30)യെയാണ് പേരാമംഗലം പൊലീസ് സ്റേഷനു സമീപമുള്ള പറമ്പിലെ കിണറ്റില്‍ കണ്ടെത്തിയത്.

അയല്‍ക്കാരിയായ സൗമിനിയെ മര്‍ദ്ദിച്ച സംഭവത്തില്‍ മുരളിക്കെതിരെ പേരാമംഗലം പൊലീസ് കേസെടുത്തിരുന്നു. ഈ കേസില്‍ ചോദ്യം ചെയ്യാന്‍ മുരളിയെ പൊലീസ് നവമ്പര്‍ 18 ഞായറാഴ്ച സ്റേഷനില്‍ വിളിപ്പിച്ചിരുന്നു. എന്നാല്‍ മുരളി ചില മാനസികാസ്വാസ്ഥ്യങ്ങള്‍ കാണിച്ചതിനെ തുടര്‍ന്ന് പൊലീസ് ചോദ്യം ചെയ്യാതെ വിട്ടയക്കുകയായിരുന്നു.

എന്നാല്‍ ഞായറാഴ്ച രാത്രി പൊലീസ് പട്രോളിംഗ് നടത്തുന്നതിനിടയില്‍ സ്റേഷന്‍ പരിസരത്തുനിന്നും ഒരാള്‍ പൊലീസിനെ കണ്ട് പേടിച്ചോടുന്നതു കണ്ടു. പൊലീസ് പിന്തുടര്‍ന്നെങ്കിലും ഇയാളെ പിടികൂടാന്‍ കഴിഞ്ഞില്ല. ഇത് മുരളിയായിരിക്കാം എന്ന് പൊലീസ് അനുമാനിക്കുന്നു. പേടിച്ചോടുന്നതിനിടയില്‍ മുരളി ആള്‍മറയില്ലാത്ത കിണറ്റില്‍ വീണിരിക്കാമെന്നാണ് പൊലീസിന്റെ നിഗമനം. മൃതദേഹം പോസ്റ്മോര്‍ട്ടത്തിനയച്ചിരിക്കുകയാണ്.