ഇന്ത്യ-ദക്ഷിണാഫ്രിക്ക ടെസ്റ് സമനിലയില്
പോര്ട്ട് എലിസബത്ത്: ദക്ഷിണാഫ്രിക്കക്കെതിരായ രണ്ടാം ക്രിക്കറ്റ് ടെസ്റില് ഇന്ത്യയ്ക്ക് സമനില. ടെസ്റിന്റെ അഞ്ചാംദിവസമായ നവമ്പര് 20 ചൊവാഴ്ച ഇന്ത്യ സമനിലയ്ക്ക് വേണ്ടി പൊരുതുകയായിരുന്നു. റണ്സെടുത്തില്ലെങ്കിലും വിക്കറ്റുകള് തുലയ്ക്കാതിരിക്കാനുള്ള ഇന്ത്യയുടെ കരുതല് ഫലം കണ്ടുവെന്നുവേണം കരുതാന്.
കളിനിര്ത്തുമ്പോള് ഇന്ത്യ മൂന്ന് വിക്കറ്റിന് 206 റണ്സ് എന്ന നിലയിലായിരുന്നു. 22 റണ്സെടുത്ത സച്ചിനും നാല് റണ്സോടെ ഗാംഗുലിയും ബാറ്റ് ചെയ്യുകയായിരുന്നു.
ജയിക്കാന് 395 റണ്സെന്ന ലക്ഷ്യവുമായി ഒരു വിക്കറ്റ് നഷ്ടപ്പെട്ട ഇന്ത്യ ചൊവാഴ്ച ബാറ്റിംഗിനിറങ്ങുമ്പോഴും മനസ്സില് ഒരേയൊരു ലക്ഷ്യമായിരുന്നു. എങ്ങിനെയെങ്കിലും സമനില പിടിച്ചുപറ്റുകയെന്ന ലക്ഷ്യം. ദീപ് ദാസ് ഗുപ്തയും ദ്രാവിഡും ആ ലക്ഷ്യം ഭംഗിയായി നിര്വഹിച്ചു. പ്രതിരോധിക്കേണ്ട പന്തിനെ പ്രതിരോധിച്ചും ശിക്ഷിക്കേണ്ട പന്തുകളെ കരുതലോടെ ശിക്ഷിച്ചും അവര് വിക്കറ്റ് നഷ്ടപ്പെടാതെ റണ്ണുകള് കൂട്ടിച്ചേര്ക്കുന്നതില് വിജയിച്ചു.
ഉച്ചഭക്ഷണം കഴിയുംവരെ രാഹുലും ദീപ്ദാസ് ഗുപ്തയും പിടിച്ചു നിന്നു. പിന്നെ അധികം വൈകാതെ സ്കോര് 171റണ്സിലെത്തി നില്ക്കുമ്പോള് രാഹുലും സ്കോര് 184 റണ്സിലെത്തി നില്ക്കുമ്പോള് ദീപ് ദാസ് ഗുപ്തയും പുറത്തായി. പകരം വന്ന ഗാംഗുലിയും സച്ചിനും സമനിലയ്ക്കുവേണ്ടി കരുതലോടെ കളിക്കുകയായിരുന്നു.
നേരത്തെ ദക്ഷിണാഫ്രിക്ക അഞ്ചിന് 233 എന്ന നിലയില് ഡിക്ലയര് ചെയ്യുകയായിരുന്നു. ഇന്ത്യയ്ക്കെതിരായ ആദ്യ ടെസ്റില് ദക്ഷിണാഫ്രിക്ക വിജയിച്ചിരുന്നു. ഇനി നവമ്പര് 24 ശനിയാഴ്ച മൂന്നാമത്തേതും അവസാനത്തേതുമായ ടെസ്റ് നടക്കും.