മണിച്ചന്റെ വീട്ടില്‍ തെളിവെടുപ്പ് നടത്തി

തിരുവനന്തപുരം: കല്ലുവാതുക്കല്‍ വിഷമദ്യദുരന്ത കേസുമായി ബന്ധപ്പെട്ട് ജില്ലാ സെഷന്‍സ് ജഡ്ജി എ. ഡെന്നീസ് കേസിലെ മുഖ്യപ്രതി മണിച്ചന്റെ വീട്ടില്‍ നേരിട്ട് തെളിവെടുപ്പ് നടത്തി. കോടതിയില്‍ ഹാജരാക്കാനാവാത്ത തെളിവുകള്‍ നേരിട്ട് കാണാനായാണ് ജഡ്ജി നവംബര്‍ 23 വെള്ളിയാഴ്ച മണിച്ചന്റെ വീട്ടിലെത്തിയത്.

കോടതിക്ക് പുറത്തുവെച്ച് തെളിവ് ശേഖരിക്കുന്നത് അപൂര്‍വസംഭവമാണ്. മണിച്ചന്റെ ചിറയിന്‍കീഴ് പട്ടരുമഠം വീട്ടിലാണ് ജഡ്ജി എ. ഡെന്നീസിന്റെ നേതൃത്വത്തിലുള്ള സംഘമെത്തിയത്.

ഔട്ട്ഹൗസിന്റെ അടിയിലായി സ്പിരിറ്റ് നിറക്കാന്‍ ഒളിപ്പിച്ചുവെച്ചിരുന്ന സിന്‍ടെക്സ് ടാങ്കും ടാങ്കിലേക്ക് സ്പിരിറ്റ് നിറക്കാനായി ഉപയോഗിച്ചിരുന്ന പമ്പിംഗ് സംവിധാനവും ജഡ്ജി നേരിട്ട് പരിശോധിച്ചു. കവര്‍ചാരായ നിര്‍മാണയൂണിറ്റിന്റെ കെട്ടിടങ്ങളിലും മണിച്ചന്റെ ഓഫീസായിരുന്ന പണ്ടകശാലയിലെ കെട്ടിടങ്ങളിലും സംഘം പരിശോധന നടത്തി.