ആറ് എക്സൈസുകാര്ക്കെതിരെ കേസ്
മലപ്പുറം: എക്സൈസുകാരുടെ റെയ്ഡിനിടയില് ദളിത് സ്ത്രീ മരിച്ച സംഭവത്തില് ആറ് എക്സൈസ് ഉദ്യോഗസ്ഥര്ക്കെതിരെ പൊലീസ് കേസെടുത്തു. ജാമ്യമില്ലാ വകുപ്പുകളായ ഐപിസി 304, ഹരിജന പീഡന നിരോധന നിയമം എന്നിവ പ്രകാരമാണ് കേസെടുത്തത്.
ഇവരെ പ്രതികളാക്കി പെരിന്തല്മണ്ണ ഡിവൈഎസ്പി ജനാര്ദനന് കോടതിയില് റിപ്പോര്ട്ട് നല്കിയിട്ടുണ്ട്. നവംബര് 22 ന് മഞ്ചെരിക്കടുത്തുള്ള എടവണ്ണ പത്തപ്പിരിയം പാണര്കുന്ന് കോളനിയിലെ വീട്ടില് നടത്തിയ റെയ്ഡിനിടയിലാണ് ദളിത് സ്ത്രീയായ പാലത്തി മരിച്ചത്.
മഞ്ചേരി എക്സൈസ് ഓഫീസിലെ പ്രിവന്റീവ് ഓഫീസര്മാരായ വി. പി. ജേക്കബ്, എന്. പി. വിജയരാഘവന്, ഗാര്ഡുമാരായ സി. പി. മുഹമ്മദ് ഇസ്ഹാക്ക്, പി. ബാലകൃഷ്ണന്, സയ്യിദ് ജലാലുദ്ദീന്, വി. ശങ്കരന് എന്നിവര്ക്കെതിരെയാണ് കേസെടുത്തിട്ടുള്ളത്.
തൃശൂര് ഫോറന്സിക് ലാബിലെ അസിസ്റന്റ് പ്രൊഫസര് അന്നമ്മ ജോണ് നവംബര് 28 ബുധനാഴ്ച പാലത്തിയുടെ വീട്ടിലെത്തി മൃതദേഹം കിടന്നിരുന്ന സ്ഥലത്ത് പരിശോധന നടത്തി.