കെപിസിസി യോഗം തുടങ്ങി

തിരുവനന്തപുരം: മദ്യനയമുള്‍പ്പടെയുള്ള കാര്യങ്ങളില്‍ തീരുമാനമെടുക്കാന്‍ കെപിസിസി നിര്‍വാഹകസമിതി യോഗം ഡിസംബര്‍ ഒന്ന് ശനിയാഴ്ച തിരുവനന്തപുരത്ത് ആരംഭിച്ചു. യോഗം കെപിസിസി പ്രസിഡന്റ് കെ. മുരളീധരന്‍ ഉദ്ഘാടനംചെയ്തു.

മുതിര്‍ന്ന കോണ്‍ഗ്രസ് നേതാവ് കെ. കരുണാകരന്‍, മുഖ്യമന്ത്രി എ.കെ. ആന്റണി, വയലാര്‍രവി, ഉമ്മന്‍ചാണ്ടി തുടങ്ങിയ നേതാക്കള്‍ യോഗത്തില്‍ പങ്കെടുക്കുന്നുണ്ട്. മദ്യനയത്തില്‍ സര്‍ക്കാര്‍ എന്തുതീരുമാനമെടുക്കണമെന്ന് ഈ യോഗം ചര്‍ച്ചചെയ്യും.

കഴിഞ്ഞ ആറുമാസക്കാലത്തെ ഭരണത്തില്‍ പാര്‍ട്ടിയും ഭരണവും സഹകരിച്ചു പോയതായി കെ.മുരളീധരന്‍ പറഞ്ഞു. പക്ഷെ ഭരണത്തിന്റെ മുന്നോട്ടുള്ള പ്രവര്‍ത്തനത്തില്‍ പാര്‍ട്ടിക്കകത്തുനിന്നും പ്രശ്നങ്ങളുണ്ടാകരുതെന്നും മുരളീധരന്‍ അഭിപ്രായപ്പെട്ടു.

ഘട്ടംഘട്ടമായി മദ്യനിരോധനം ഏര്‍പ്പെടുത്തുകയെന്നതാണ് പാര്‍ട്ടിയുടെ തീരുമാനം. കള്ള് ഷാപ്പ് സഹകരണസംഘം പിരിച്ചുവിടും. ബദല്‍ സംവിധാനത്തെക്കുറിച്ച് യോഗത്തില്‍ തീരുമാനിക്കുമെന്നും മുരളീധരന്‍ പറഞ്ഞു.

അബ്കാരിനിയമം കര്‍ശനമായി പാലിക്കും. ഈ നിയമം ലംഘിക്കുന്ന ഉദ്യോഗസ്ഥരെ കര്‍ശനമായി ശിക്ഷിക്കുമെന്നും അദ്ദേഹം വ്യക്തമാക്കി. കാര്‍ഷികമേഖലയിലെ പ്രതിസന്ധിയ്ക്ക് ഇന്‍ഫാം പോലെയുള്ള സംഘടനകള്‍ കേന്ദ്രത്തെയും കേരളത്തെയും ഒരുപോലെ കുറ്റപ്പെടുത്തുകയാണ്. കാര്‍ഷികമേഖലയിലെ പ്രശ്നങ്ങള്‍ പരിഹരിക്കണമെന്നാവശ്യപ്പെട്ട് കേന്ദ്രത്തിനെതിരെ സമരം ആരംഭിക്കുമെന്നും മുരളീധരന്‍ പറഞ്ഞു.