മാതൃഭൂമിയിലെ പ്രസ്താവന:15 പേര്‍ക്കെതിരെ കോടതിയലക്ഷ്യ കേസ്

കൊച്ചി: മാതൃഭൂമി പത്രാധിപര്‍ കെ. ഗോപാലകൃഷ്ന്‍ സ്ട്രെച്ചറില്‍ കോടതിയില്‍ ഹാജരാകേണ്ടിവന്നതിന്റെ പേരില്‍ കോടതിക്കെതിരെ പ്രസ്താവന നടത്തിയ 15 പേര്‍ക്കെതിരെ ഹൈക്കോടതി സ്വമേധയാ കോടതിയലക്ഷ്യത്തിന് കേസെടുത്തു. സുപ്രിം കോടതി മുന്‍ ജഡ്ജിമാരായ വി. ആര്‍. കൃഷ്ണയ്യര്‍, വി. ബാലകൃഷ്ണ ഏറാടി, മാതൃഭൂമി മാനേജിംഗ് എഡിറ്റര്‍ പി. വി. ചന്ദ്രന്‍, കെ. ഗോപാലകൃഷ്ണന്‍ എന്നിവരും കേസിലുള്‍പ്പെടുന്നു.

മാതൃഭൂമി എംഡി എം. പി. വീരേന്ദ്രകുമാര്‍, വയലാര്‍ രവി, എന്‍. റാം, കുല്‍ദീപ് നയ്യാര്‍, മനുഷ്യാവകാശ കമ്മിഷന്‍ അംഗം എസ്. ബലരാമന്‍, തലേക്കുന്നില്‍ ബഷീര്‍, ചോരാമസ്വാമി, ടി. ജെ. എസ്. ജോര്‍ജ്, ജെ. പി. മാത്തൂര്‍, ദീനാനാഥ് മിശ്ര, ദളിത് ഫെഡറേഷന്‍ പ്രസിഡന്റ് രാമഭദ്രന്‍ എന്നിവരാണ് കേസിലുള്‍പ്പെട്ട മറ്റുള്ളവര്‍.

മറ്റൊരു കോടതിയലക്ഷ്യകേസുമായി ബന്ധപ്പെട്ട് കോടതിയില്‍ സ്ട്രച്ചറില്‍ ഹാജരാകേണ്ടി വന്നത് തന്റെ അഭിഭാഷകന്‍ തന്നെ തെറ്റിദ്ധരിപ്പിച്ചതു മൂലമാണെന്ന് കഴിഞ്ഞ ദിവസം ഗോപാലകൃഷ്ണന്‍ കോടതിയില്‍ വ്യക്തമാക്കിയിരുന്നു. ഗോപാലകൃഷ്ണന് സ്ട്രച്ചറില്‍ ഹാജരാകേണ്ടിവന്നതിന് കോടതിയെ കുറ്റപ്പെടുത്തികൊണ്ടിയിരുന്നു കേസിലുള്‍പ്പെട്ടര്‍ പ്രസ്താവന പുറപ്പെടുവിച്ചത്. മാതൃഭൂമി പത്രത്തിലാണ് പ്രസ്താവനകള്‍ പ്രസിദ്ധീകരിച്ചത്.

ഇതിനിടെ പ്രസ്താവന പിന്‍വലിച്ചുകൊണ്ട് വി. ആര്‍. കൃഷ്യ്യര്‍ ഹൈക്കോടതി ജഡ്ജി മോഹന്‍കുമാറിന് കത്തയച്ചു. എന്നാല്‍ കേസിലുള്‍പ്പെട്ട വ്യക്തി ഹൈക്കോടതി ജഡ്ജിക്ക് കത്തയച്ചതിനെ ഡിവിഷന്‍ ബെഞ്ച് വിമര്‍ശിച്ചു.