പാക് സ്ഥാനപതികാര്യാലയത്തില് സ്ഫോടനം
ടെഹ്റാന്: ഇറാനിലെ പാക് സ്ഥാനപതികാര്യാലയത്തില് ബോംബ്സ്ഫോടനം. ഇറാന്റെ തെക്കുകിഴക്കന് നഗരമായ സഹേദാനിലുള്ള ഓഫീസില് ഡിസംബര് ഒന്ന് ശനിയാഴ്ച രാത്രിയാണ് സ്ഫോടനമുണ്ടായത്.
സ്ഫോടനത്തില് ഒരാള്ക്ക് ഗുരുതരമായി പരിക്കേറ്റു. അതേ സമയം ഓഫീസിന് കാര്യമായ കേടുപാടില്ലെന്ന് പറയപ്പെടുന്നു. സ്ഥാനപതികാര്യാലയത്തിന്റെയും പരിസരത്തെ കെട്ടിടങ്ങളിലെയും ജനലുകള് തകര്ന്നു. അഫ്ഗാന്-പാകിസ്ഥാന് അതിര്ത്തിക്കടുത്താണ് ഈ സ്ഥാനപതി കാര്യാലയം.
എന്നാല് സ്ഫോടനത്തിന് പിന്നില് ആരാണെന്ന് അറിവായിട്ടില്ല. ഇവിടെ ധാരാളം അഫ്ഗാന് അഭയാര്ത്ഥികള് താമസിക്കുന്നുണ്ട്. സഹേദാന് നഗരത്തിലെ അഞ്ച് ലക്ഷം വരുന്ന ജനങ്ങളില് 20,000 പേര് അഫ്ഗാനില് നിന്നുള്ള കുടിയേറ്റക്കാരാണ്. അഫ്ഗാനിസ്ഥാനെതിരായ ആക്രമണത്തില് അമേരിക്കയെ പിന്തുണയ്ക്കാനുള്ള പാകിസ്ഥാന്റെ തീരുമാനത്തിനെതിരെ ഒക്ടോബര് 12ന് ഇവിടെ വന്പ്രതിഷേധപ്രകടനം നടന്നിരുന്നു.