തമിഴ് മക്കള്‍ക്കിത് ആഘോഷം

ചെന്നൈ: ജയലളിതയ്ക്കനുകൂലമായ ചെന്നൈ ഹൈക്കോടതി വിധി എ. ഐ. ഡി. എം. കെ പ്രവര്‍ത്തകര്‍ ആഘോഷിക്കുകയാണ്. തെരുവില്‍ നൃത്തം ചവിട്ടിയും പടക്കം പൊട്ടിച്ചും ആഹ്ലാദ പ്രകടനം നടത്തുകയാണവര്‍.

പാര്‍ട്ടി പ്രവര്‍ത്തകര്‍ ജയലളിതയുടെ ഔദ്യോഗിക വസതിയായ പോയസ് ഗാര്‍ഡനിലേക്ക് പൂച്ചെണ്ടുമായി കൂട്ടം കൂട്ടമായി ഒഴുകുന്നു. തെരുവിലെങ്ങും മധുരപലഹാരം വിതരണംചെയ്യുന്ന എ. ഐ. ഡി. എം. കെ പ്രവര്‍ത്തകരെയും കാണാം.

എത്രയും പെട്ടെന്നുതന്നെ അമ്മ വീണ്ടും മുഖ്യമന്ത്രിയായി സ്ഥാനമേല്‍ക്കുമെന്നാണ് പ്രവര്‍ത്തകരുടെ വിശ്വാസം. അതാണ് ആഘോഷങ്ങള്‍ക്ക് പിന്നിലെ ചേതോവികാരം. ഇപ്പോഴത്തെ മുഖ്യമന്ത്രി പനീര്‍ ശെല്‍വം സ്ഥാനമൊഴിയാന്‍ തയാര്‍ പ്രകടിപ്പിച്ചു കഴിഞ്ഞു. മുഖ്യമന്ത്രിയായി സ്ഥാനമേറ്റ ശേഷം വൈകാതെ തന്നെ ആണ്ടിപ്പെട്ടിയില്‍ നിന്ന് ജയലളിത മത്സരിച്ച് നിയമസഭയിലെത്തും.

മുന്‍ഭരണകാലത്ത് താന്‍സി ഭൂമി ഇടപാടില്‍ അവിഹിതമായി ഭൂമി സ്വന്തമാക്കി എന്നാരോപിച്ച് കരുണാനിധിയുടെ നേതൃത്വത്തിലുളള മന്ത്രിസഭയാണ് ജയലളിതയ്ക്കെതിരെ കേസ് ഫയല്‍ ചെയ്തത്.

ഈ കേസില്‍ വിചാരണ നേരിടുന്നതുകൊണ്ട് എഐഎഡിഎംകെ അധികാരത്തില്‍ വന്നെങ്കിലും ജയലളിതയ്ക്ക് സുപ്രീംകോടതിയുടെ വിധിയെ തുടര്‍ന്ന് മുഖ്യമന്ത്രി സ്ഥാനം ഒഴിഞ്ഞു. തുടര്‍ന്ന് മുഖ്യമന്ത്രിസ്ഥാനത്ത് പാവയായി എംഎല്‍എ ആയ പനീര്‍ശെല്‍വത്തെ നിയോഗിച്ച് ഭരണം നിയന്ത്രിക്കുകയായിരുന്നു അവര്‍. കുറ്റവിമുക്തയായി താന്‍ എത്രയും വേഗം തമിഴ്നാട് മുഖ്യമന്ത്രിയാകുമെന്ന് ജയ പ്രസ്താവിച്ചിരുന്നു