താന്‍സി കേസില്‍ ജയയെ കുറ്റവിമുക്തയാക്കി

ചെന്നൈ: താന്‍സി ഭൂമിയിടപാട് കേസില്‍ ജയലളിതയെ കുറ്റവിമുക്തയാക്കിക്കൊണ്ട് ചെന്നൈ ഹൈക്കോടതി വിധി പ്രസ്താവിച്ചു. പ്ലെസന്റ് ഡേ ഹോട്ടല്‍ കേസിലും ജയയെ കുറ്റവിമുക്തയാക്കി. ഡിസംബര്‍ നാല് ചൊവാഴ്ചയായിരുന്നു ദൂരവ്യാപക ഫലങ്ങളുണ്ടാക്കുന്ന ഈ വിധി ഉണ്ടായത്. ജസ്റിസ് എന്‍. ദിനകര്‍ ആണ് വിധി പ്രസ്താവിച്ചത്.

താന്‍സി ഭൂമിയിടപാട് കേസില്‍ ശിക്ഷിപ്പെട്ടതിനാലാണ് സുപ്രീംകോടതി ജയലളിതയെ മുഖ്യമന്ത്രി സ്ഥാനത്ത് തുടരുന്നതില്‍ നിന്നും വിലക്കിയത്. താന്‍സി ഭൂമിയിടപാട് കേസില്‍ ശിക്ഷിക്കപ്പെട്ടതിനാല്‍ കഴിഞ്ഞ നിയമസഭാ തിരഞ്ഞെടുപ്പില്‍ മത്സരിക്കുന്നതില്‍ നിന്നും ജയലളിതയെ തിരഞ്ഞെടുപ്പ് കമ്മീഷന്‍ വിലക്കിയിരുന്നു.

നേരത്തെ ഡിഎംകെ സര്‍ക്കാര്‍ ഏര്‍പ്പെടുത്തിയ ചെന്നൈയിലെ പ്രത്യേക കോടതിയാണ് താന്‍സി ഭൂമിയിടപാട് കേസില്‍ ജയലളിതയെയും മറ്റ് അഞ്ചു പേരെയും മൂന്നു വര്‍ഷം കഠിനതടവിന് വിധിച്ചത്. അന്ന് ഗൂഡാലോചനയ്ക്ക് ഇന്ത്യന്‍ ശിക്ഷാനിയമം 120-ബി, പൊതുപ്രവര്‍ത്തകരുടെ കുറ്റകരമായ വിശ്വാസവഞ്ചനയ്ക്ക് 409 എന്നീ വകുപ്പുകള്‍ പ്രകാരമാണ് ഈ കേസില്‍ ജയലളിതയ്ക്ക് പ്രത്യേക ജഡ്ജി പി. അമ്പഴകന്‍ ശിക്ഷവിധിച്ചത്.

താന്‍സികേസില്‍ മൂന്നുവര്‍ഷവും പ്ലസന്റ് ഡേ ഹോട്ടല്‍ കേസില്‍ ഒരു വര്‍ഷം തടവുമാണ് ജയലളിതയ്ക്ക് വിധിച്ചത്. ചെന്നൈ ഹൈക്കോടതി വിധിയോടെ ജയലളിതയ്ക്ക് വീണ്ടും മുഖ്യമന്ത്രിയാകാന്‍ വഴിയൊരുങ്ങിയിരിക്കുകയാണെന്ന് നിയമവിദഗ്ധര്‍ പറയുന്നു. ജയലളിതയ്ക്ക് വേണ്ടി താന്‍ മുഖ്യമന്ത്രി പദം ഉടനെ ഒഴിയുമെന്ന് തമിഴ്നാട് മുഖ്യമന്ത്രി പനീര്‍ശെല്‍വം പറഞ്ഞു.