സ്കൂളുകളില്‍ റാങ്ക് സമ്പ്രദായം നിര്‍ത്തുന്നു

തിരുവനന്തപുരം: ഒന്നു മുതല്‍ പത്തുവരെയുള്ള ക്ലാസ്സുകളില്‍ റാങ്ക് സമ്പ്രദായം നിര്‍ത്താന്‍ കരിക്കുലം സ്റിയറിങ്ങ് കമ്മിറ്റി തീരുമാനിച്ചു. പകരം ഗ്രേഡിംഗ് സമ്പ്രദായം കൊണ്ടുവരും.

അടുത്ത അധ്യയനവര്‍ഷത്തില്‍ പത്താംക്ലാസ്സില്‍ റാങ്ക് സമ്പ്രദായം നിര്‍ത്തി ഗ്രേഡിംഗ് സമ്പ്രദായം നടപ്പാക്കും. മറ്റു ക്ലാസ്സുകളില്‍ ഈ വര്‍ഷം മുതല്‍ ഗ്രേഡിംഗ് സമ്പ്രദായം ഏര്‍പ്പെടുത്തും. എഴുത്തുപരീക്ഷയും ഇന്റേണല്‍ അസസ്സ്മെന്റും ചേര്‍ത്താണ് ഗ്രേഡ് തീരുമാനിക്കുക. പ്രോഗ്രസ് കാര്‍ഡിന് പകരം ക്യുമിലേറ്റീവ് കാര്‍ഡ് ഏര്‍പ്പെടുത്തും.

ഒന്നു മുതല്‍ പത്തുവരെയുള്ള ക്ലാസ്സുകളിലെ പാഠപുസ്തകങ്ങള്‍ പരിഷ്കരിക്കാനും തീരുമാനിച്ചിട്ടുണ്ട്. സ്കൂള്‍ പാഠ്യപദ്ധതി പരിഷ്കരിക്കാന്‍ ഏര്‍പ്പെടുത്തിയ ഡോ. എ. സുകുമാരന്‍നായര്‍ കമ്മിറ്റിയുടെ ശുപാര്‍ശകളെല്ലാം വിദ്യാഭ്യാസമന്ത്രി നാലകത്ത് സൂപ്പിയുടെ അധ്യക്ഷതയില്‍ ചേര്‍ന്ന സമിതി അംഗീകരിച്ചു.

എട്ടാംക്ലാസിലെ പാഠപുസ്തകങ്ങള്‍ അടുത്ത അധ്യയനവര്‍ഷത്തില്‍ മാറും. ഒന്നു മുതല്‍ മൂന്നുവരെ ക്ലാസ്സുകളിലെയും ഒമ്പതാംക്ലാസ്സിലെയും പുസ്തകങ്ങള്‍ 2003-2004ല്‍ പരിഷ്കരിക്കും. അടുത്ത വര്‍ഷം മുതല്‍ മൂന്നാംക്ലാസ്സില്‍ കമ്മ്യൂണിക്കേറ്റീവ് ഇംഗീഷ് ആരംഭിക്കും.