കണ്ണൂരില്‍ ഡിവൈഎസ്പിയ്ക്ക് നേരെ ബോംബേറ്

കണ്ണൂര്‍: സംഘര്‍ഷമവസാനിപ്പിക്കാന്‍ വേണ്ടി സ്ഥലത്തെത്തിയ ഡിവൈഎസ്പിയ്ക്ക് നേരെ അക്രമികള്‍ ബോംബെറിഞ്ഞു. തുടര്‍ന്ന് പൊലീസ് അക്രമികള്‍ക്ക് നേരെ മൂന്നു റൗണ്ട് വെടിവച്ചു. ഡിസംബര്‍ അഞ്ച് ബുധനാഴ്ച മട്ടന്നൂരിലാണ് സംഭവമുണ്ടായത്.

എന്‍ഡിഎഫ് - ബിജെപി സംഘര്‍ഷത്തെ തുടര്‍ന്നാണ് ഡിവൈഎസ്പി എന്‍. ചന്ദ്രന്റെ നേതൃത്വത്തില്‍ പൊലീസ് മട്ടന്നൂരിലെ ശിവപുരത്തിനടുത്ത് പടുപാറയില്‍ എത്തിയത്. അക്രമികളെ ഓടിപ്പിടിക്കാന്‍ ശ്രമിക്കുന്നതിനിടയിലാണ് ഡിവൈഎസ്പിയ്ക്ക് നേരെ ബോംബേറുണ്ടായത്. തുടര്‍ന്ന് അദ്ദേഹം തന്നെ അക്രമികള്‍ക്ക് നേരെ നിറയൊഴിച്ചു.

കണ്ണൂര്‍ എസ്പി മനോജ് എബ്രഹാമിന്റെ നേതൃത്വത്തില്‍ വ്യാപകമായ റെയ്ഡ് നടന്നുവരികയാണ്. സംഘര്‍ഷമുണ്ടായാല്‍ അക്രമികള്‍ക്ക് നേരെ വെടിവയ്ക്കാന്‍ പൊലീസിന് നിര്‍ദ്ദേശം നല്കിയിട്ടുണ്ടെന്ന് ഡിഐജി മുഹമ്മദ് യാസിന്‍ പറഞ്ഞു.

ചൊവാഴ്ച രാത്രിയാണ് അക്രമമുണ്ടായത്. ആദ്യം ബിജെപി പ്രവര്‍ത്തകരുടെ വീടാണ് ആക്രമിക്കപ്പെട്ടത്. പിന്നീട് ബിജെപിക്കാര്‍ സംഘടിച്ച് എന്‍ഡിഎഫുകാരുടെ വീടുകള്‍ ആക്രമിക്കുകയായിരുന്നു.