വരുന്നു.... ഓണ്ലൈന് ഭാഗ്യക്കുറി
ദില്ലി: ഒടുവില് ഇന്ത്യയിലും ഓണ്ലൈന് ഭാഗ്യക്കുറി വരുന്നു. കമ്പ്യൂട്ടര് വഴി ഭാഗ്യം പരീക്ഷിക്കാവുന്ന സംവിധാനമാണ് ഓണ്ലൈന് ലോട്ടറി. 2002 ഫിബ്രവരിയോടെ ഇന്ത്യയില് ഓണ്ലൈന് ഭാഗ്യക്കുറി നിലവില് വരുമെന്നാണ് കണക്കുകൂട്ടല്.
സീ ടെലിവിഷന് ചാനലിന്റെ ഉടമസ്ഥരുടെ പ്ലെവിന് ഇന്ഫ്രാവെസ്റ് എന്ന കമ്പനിയാണ് ഇന്ത്യയില് ഓണ്ലൈന് ഭാഗ്യക്കുറിയുമായി രംഗത്തെത്തുന്നത്.
കര്ണാടകവും സിക്കിമും നടപ്പാക്കുന്ന ഓണ്ലൈന് ഭാഗ്യക്കുറിയുടെ കരാര് പ്ലെവിന് എന്ന കമ്പനി നേടിക്കഴിഞ്ഞു. ഈ കമ്പനിയായിരിക്കും ആദ്യം ഓണ്ലൈന് ഭാഗ്യക്കുറി നടപ്പാക്കുക. ഇതിനായി 300 കോടി രൂപ ചെലവിടാനാണ് കമ്പനിയുടെ പരിപാടി.
രാജ്യത്തെമ്പാടുമായി 5,000 ചില്ലറ വില്പ്പനക്കാരെ കണ്ടെത്തിയാണ് ഇത് നടപ്പാക്കുന്നത്. ഒരുവര്ഷം കൊണ്ടാണ് ഇത്രയും ഓണ്ലൈന് ഭാഗ്യക്കുറി വില്പ്പന കേന്ദ്രങ്ങള് കണ്ടെത്തുകയെന്ന് പ്ലെവിന് കമ്പനിയുടെ മേധാവി ആര്. കെ. സിംങ് പറഞ്ഞു.
മൂന്നുവര്ഷംകൊണ്ട് കമ്പനി ലാഭത്തിലാവുമെന്നാണ് കണക്കുകൂട്ടുന്നത്. ഇക്കാലം കൊണ്ട് ഓണ്ലൈന് ഭാഗ്യക്കുറി എന്ന പുത്തന് ആശയത്തിന് പ്രചാരം കിട്ടുമെന്നും കമ്പനി കരുതുന്നു. 5000 കോടി രൂപയുടേതാണ് ഇപ്പോഴത്തെ ഭാഗ്യക്കുറി വിപണി. ഇതിന്റെ പത്ത് ശതമാനമെങ്കിലും ആദ്യ വര്ഷം തന്നെ ഓണ് ലൈന് ഭാഗ്യക്കുറിയിലേക്ക് എത്തുമെന്നാണ് പ്രതീക്ഷ.
ഓണ്ലൈന് ഭാഗ്യക്കുറിയുടെ പ്രതിവാര നറുക്കെടുപ്പിന്റെ തത്സമയ സംപ്രേക്ഷണം സീ ടെലിവിഷനില് ഉണ്ടാവും. മോഡി എന്റര്ടെയിന്മെന്റ് എന്ന കമ്പനിയും വൈകാതെ ഓണ്ലൈന് ഭാഗ്യക്കുറി രംഗത്തേക്ക് പ്രവേശിക്കുന്നുണ്ട്.