സീറ്റ് ബെല്‍റ്റ് നിര്‍ബന്ധമെന്ന് സുപ്രീംകോടതി

ദില്ലി: കാറുകളില്‍ മുന്‍സീറ്റിലിരുന്ന് യാത്രചെയ്യുന്നവര്‍ നിര്‍ബന്ധമായും സീറ്റ്ബെല്‍റ്റ് ധരിയ്ക്കണമെന്ന് സുപ്രീംകോടതി. ഡിസംബര്‍ ആറ് വ്യാഴാഴ്ചയാണ് സുപ്രീംകോടതി ഡിവിഷന്‍ ബെഞ്ച് ഈ ഉത്തരവ് പുറപ്പെടുവിച്ചത്.

വാഹനാപകടം കൂടിവരുന്ന സാഹചര്യത്തിലാണ് സുപ്രീംകോടതി ഈ വിധി പ്രസ്താവിച്ചത്. ഈ ഉത്തരവ് ഉടന്‍ നടപ്പിലാക്കാന്‍ എല്ലാം സംസ്ഥാനങ്ങളിലേയും കേന്ദ്രഭരണപ്രദേശങ്ങളിലെയും ചീഫ് സെക്രട്ടറിമാരോട് നിര്‍ദേശിച്ചിട്ടുണ്ട്.

ദില്ലിയില്‍ മാത്രം ഒരു മാസം 150 ഓളം പേര്‍ റോഡപകടങ്ങളില്‍ മരിക്കുന്നുവെന്ന് കണ്ടെത്തിയതിനെതുടര്‍ന്നാണ് സുപ്രീംകോടതി സീറ്റ് ബെല്‍റ്റ് കര്‍ശനമാക്കിയത്. കേന്ദ്രം ഇക്കാര്യത്തില്‍ വേണ്ട നടപടികള്‍ തുടങ്ങിക്കഴിഞ്ഞതായി അഡീഷണല്‍ സോളിസിറ്റര്‍ ജനറല്‍ മുകുള്‍ രൊഹാതാഗി പറഞ്ഞു. അതേ സമയം 2002 ഒക്ടോബര്‍ മുതല്‍ പിന്‍സീറ്റ് യാത്രക്കാര്‍ക്കും സീറ്റ് ബെല്‍റ്റ് കര്‍ശനമാക്കുമെന്ന് അദ്ദേഹം കോടതിയെ അറിയിച്ചു.