ലൈസന്‍സില്ലാതെ കള്ള് വില്പന അനുവദിക്കണം

തിരുവനന്തപുരം: ലൈസന്‍സ് കൂടാതെ കള്ള് വില്‍ക്കാന്‍ അനുമതി ലഭിക്കണെമെന്ന് വിനോദസഞ്ചാരമന്ത്രി കെ. വി. തോമസ് യുഡിഫ് ഉന്നതാധികാര സമിതിക്കു മുന്നില്‍ നിര്‍ദേശം വെച്ചു. കേരളം ഒഴികെയുള്ള ഒരു സംസ്ഥാനത്തും കള്ള് മദ്യമായി കണക്കാക്കുന്നില്ലെന്ന് അദ്ദേഹം ചൂണ്ടിക്കാട്ടി.

ബാറുകള്‍ക്കും ബിയര്‍ പാര്‍ലറുകള്‍ക്കും ദൂരപരിധി നിര്‍ബന്ധമാക്കാതിരിക്കണമെന്ന നിര്‍ദേശവും മന്ത്രി മുന്നോട്ടുവെച്ചിട്ടുണ്ട്.

ത്രീസ്റാര്‍ മുതലുള്ള എല്ലാ ഹോട്ടലുകള്‍ക്കും ബാര്‍ ലൈസന്‍സ് നല്‍കണം. കെടിഡിസിയുടെ ഹോട്ടലുകള്‍, റസ്റോറന്റുകള്‍, വിശ്രമകേന്ദ്രങ്ങള്‍ എന്നിവയ്കും ഐടിഡിസി ഹോട്ടലുകള്‍ക്കും എയര്‍പോര്‍ട്ട് റസ്റോറന്റുകള്‍ക്കും ബിയര്‍-വൈന്‍ പാര്‍ലര്‍ ലൈസന്‍സ് നല്‍കണം.

ബാര്‍ ലൈസന്‍സ് ഫീസ് 10 ലക്ഷമായും ബിയര്‍-വൈന്‍ പാര്‍ലര്‍ ലൈസന്‍സ് ഫീസ് ഒരു ലക്ഷമായും കുറക്കുക, ബിവറേജസ് കോര്‍പ്പറേഷന് കൂടുതല്‍ വില്പനശാലകള്‍ അനുവദിക്കുക എന്നീ നിര്‍ദേശങ്ങളും അദ്ദേഹം മുന്നോട്ടുവെച്ചു.

വിനോദഞ്ചാര വ്യവസായം വികസിപ്പിക്കുക എന്ന ഉദ്ദേശ്യത്തോടെയാണ് തോമസ് നിര്‍ദേശങ്ങള്‍ മുന്നോട്ടുവെച്ചത്. അടുത്ത യുഡിഎഫ് യോഗത്തില്‍ തോമസിന്റെ നിര്‍ദേശങ്ങള്‍ ചര്‍ച്ചക്കെടുക്കും.