അഫ്ഗാന്‍ സര്‍ക്കാര്‍: ദോസ്തം പിന്മാറി

കാബൂള്‍: അഫ്ഗാനിസ്ഥാനില്‍ ഇടക്കാല സര്‍ക്കാരുണ്ടാക്കാനുള്ള ഐക്യരാഷ്ട്രസഭയുടെ നേതൃത്വത്തിലുള്ള ശ്രമങ്ങള്‍ക്ക് തിരിച്ചടി. ഇടക്കാല സര്‍ക്കാരില്‍ നിന്ന് ഉസ്ബെക്ക് നേതാവ് അബ്ദുള്‍ റഷിദ് ദോസ്തം മന്ത്രിസഭയില്‍ നിന്ന് പിന്മാറാന്‍ തീരുമാനിച്ചതോടെയാണിത്.

തനിക്ക് തീരെ അപ്രധാനമായ വകുപ്പുകള്‍ നല്കിയെന്നാരോപിച്ചാണ് ദോസ്തം ഡിസംബര്‍ ആറ് വ്യാഴാഴ്ച മന്ത്രിസഭയില്‍ നിന്നും പിന്മാറാന്‍ തീരുമാനിച്ചത്. വിദേശകാര്യമന്ത്രിയാകാനാണ് ദോസ്തം ശ്രമിച്ചത്. പക്ഷെ വ്യവസായം, കൃഷി, മൈനിംഗ് എന്നീ വകുപ്പുകളാണ് ദോസ്തമിന് നല്കിയത്.

ആറുമാസത്തേക്ക് അഫ്ഗാനിസ്ഥാനില്‍ ഭരണം നടത്തുന്നതിനാണ് ഇടക്കാലസര്‍ക്കാരുണ്ടാക്കുന്നത്. ഇടക്കാലമന്ത്രിസഭയില്‍ നിന്നും രാജിവച്ചെന്നും ഇനി സ്ഥിരം ഭരണസംവിധാനമുണ്ടാകുന്നതുവരെ താന്‍ കാബൂളിലേക്ക് കടക്കില്ലെന്നും ദോസ്തം പറഞ്ഞു. വടക്കന്‍സേനയുടെ പ്രധാനകമാന്റര്‍മാരിലൊരാളാണ് ദോസ്തം.