കയര്‍ത്തൊഴിലാളികള്‍ സമരം തുടങ്ങി

ആലപ്പുഴ: അമ്പലപ്പുഴ, ചേര്‍ത്തല താലൂക്കുകളിലെ 40,000 ഓളം വരുന്ന കയര്‍ത്തൊഴിലാളികള്‍ ഡിസംബര്‍ ഏഴ് വെള്ളിയാഴ്ച സമരം തുടങ്ങി. വലുതും ചെറുതുമായ കയര്‍നിര്‍മ്മാണ ഫാക്ടറികളില്‍ ഉല്പാദനമടക്കം എല്ലാ ജോലികളും സ്തംഭിച്ചു.

കയറിന്റെ കയറ്റിറക്കുമതിയും സമരം ചെയ്യുന്ന തൊഴിലാളികള്‍ തടഞ്ഞു. എല്ലാ തൊഴിലാളിയൂണിനുകളും ചേര്‍ന്ന സംയുക്തസമരസമിതിയുടെ നേതൃത്വത്തിലാണ് സമരം. കയറിന്റെ തറവില പുന:സ്ഥാപിക്കുക, റിബേറ്റ് പുന: സ്ഥാപിക്കുക, പൊതുമേഖലാസ്ഥാപനങ്ങളെ അടച്ചുപൂട്ടലില്‍ നിന്നും രക്ഷിക്കുക, കൂലിയും വേതനവും കാലാനുസൃതമായി പരിഷ്കരിക്കുക എന്നീ ആവശ്യങ്ങള്‍ ഉന്നയിച്ചാണ് സമരം.

ഡോളറിന്റെ വിലയുയര്‍ന്നിട്ടും കയര്‍ത്തൊഴിലാളികള്‍ക്ക് അതിനനുസരിച്ചുള്ള ആനുകൂല്യം നിഷേധിക്കുകയാണെന്ന് സംയുക്തസമരസമിതി നേതാക്കള്‍ ആരോപിക്കുന്നു. സമരത്തിന്റെ ഭാഗമായി ആലപ്പുഴയിലും ചേര്‍ത്തലയിലും കയര്‍ത്തൊഴിലാളികള്‍ ഡിസംബര്‍ എട്ട് ശനിയാഴ്ച വഴിതടയും.