ശബരിമല ഉത്സവം ഡിസംബര്‍ ഒമ്പത് മുതല്‍

ശബരിമല: ശബരിമല ക്ഷേത്രോത്സവത്തിന് ഡിസംബര്‍ ഒമ്പത് ഞായറാഴ്ച കൊടിയേറും. ഡിസംബര്‍ 18 വരെയാണ് ഉത്സവം.

ഡിസംബര്‍ ഒമ്പതിന് രാവിലെ 9.06നും 10നും ഇടക്കുള്ള മകരം രാശി മൂഹൂര്‍ത്തത്തിലാണ് കൊടിയേറ്റം. ഉത്സവത്തിന്റെ മുന്നോടിയെന്ന നിലയില്‍ ഡിസംബര്‍ ഏഴിന് പ്രാസാദ ശുദ്ധിക്രിയകള്‍ നടക്കും. രാത്രി 7.30 മുതല്‍ മുതല്‍ 9.30 വരെയാണ് ഇത്. എട്ടിന് രാവിലെ 10 മുതല്‍ ബിംബശുദ്ധിക്രിയകള്‍ നടക്കും. രാത്രി 7.30 വരെ മുളയിടീല്‍. മുളപൂജ എന്നിവ നടക്കും.

ഉത്സവത്തിന്റെ കൊടിയേറ്റം നടക്കുന്ന ഞായറാഴ്ച വൈകീട്ട് ശ്രീഭൂതബലിയുണ്ടാവും. ഡിസംബര്‍ 11 മുതല്‍ 17 വരെ എല്ലാ ദിവസവും മുളപൂജ, ഉത്സവബലി ദര്‍ശനം, ശ്രീഭൂതബലി, എഴുന്നള്ളത്ത്. 17ന് രാത്രി പള്ളിവേട്ട പുറപ്പാട്. 18ന് രാവിലെ അഞ്ചിന് പള്ളിയുണര്‍ത്ത്. തുടര്‍ന്ന് അഭിഷേകം, 7.30ന് ഉഷപൂജ, എട്ടിന് ആറാട്ടുബലി, ഒമ്പതിന് ആറാട്ട് പുറപ്പാട്.

ആറാട്ടിന് ശേഷം തിരുവിഗ്രഹം പമ്പാ ഗണപതി ക്ഷേത്രത്തിന് മുമ്പിലുള്ള നടപന്തലില്‍ ദര്‍ശനത്തിനായി വെക്കും. മൂന്ന് മണിക്ക് ശബരിമലയിലേക്ക് തിരിച്ചെഴുന്നള്ളത്ത്. ഈ സമയത്ത് പമ്പ മുതല്‍ സന്നിധാനം വരെ ഭക്തര്‍ക്ക് പറയിടാം.