കേരളത്തില് തിങ്കളാഴ്ച ഹര്ത്താല്
തിരുവനന്തപുരം: പത്തനംതിട്ടജില്ലയില് എന്ഡിഎഫ് പ്രവര്ത്തകര് നടത്തിയ അക്രമത്തില് പ്രതിഷേധിച്ച് ഡിസംബര് 10 തിങ്കളാഴ്ച വിശ്വഹിന്ദുപരിഷത്ത് സംസ്ഥാനവ്യാപകമായി ഹര്ത്താല് നടത്തും. ഡിസംബര് എട്ട് ശനിയാഴ്ച വിശ്വഹിന്ദുപരിഷത്ത് സംസ്ഥാന ഓര്ഗനൈസിംഗ് സെക്രട്ടറി കുമ്മനം രാജശേഖരന് വാര്ത്താസമ്മേളനത്തില് അറിയിച്ചതാണ് ഇക്കാര്യം.
കഴിഞ്ഞ ദിവസം അയ്യപ്പന്മാര്ക്കുനേരെ പിഡിപി പ്രവര്ത്തകര് നടത്തിയ അക്രമത്തില് പ്രതിഷേധിച്ച് സെക്രട്ടേറിയറ്റ് നടയ്ക്കല് തേങ്ങയുടയ്ക്കുമെന്നും കുമ്മനം പറഞ്ഞു. അക്രമത്തെ അമര്ച്ചചെയ്യാന് കഴിയാത്ത മുഖ്യമന്ത്രി രാജിവയ്ക്കണമെന്നും അദ്ദേഹം പറഞ്ഞു.
പിഡിപി-എന്ഡിഎഫ് പ്രവര്ത്തകര് നടത്തുന്ന അഴിഞ്ഞാട്ടങ്ങളെ അമര്ച്ചചെയ്യാന് കഴിയാത്ത മുഖ്യമന്ത്രി ആഭ്യന്തരപദം ഒഴിയണമെന്ന് ബിജെപി സംസ്ഥാനജനറല് സെക്രട്ടറി പി.പി. മുകുന്ദന് വാര്ത്താസമ്മേളനത്തില് പറഞ്ഞു. എന് ഡി എഫ് നടത്തുന്ന അക്രമങ്ങളെ അപലപിയ്കാന് കോണ്ഗ്രസും മുസ്ലിം ലീഗും തയ്യാറാവണം. മൗനം പാലിക്കുന്ന ഭരണാധികാരികളുടെ നിലപാടാണ് അക്രമങ്ങള് കൂടാന് കാരണം എന്നും അദ്ദേഹം പറഞ്ഞു.