ഉഷ സംഭവം: പ്രകാശന്റെ സസ്പെന്‍ഷന്‍ പിന്‍വലിച്ചു

കോഴിക്കോട്: പി. ഇ. ഉഷയ്ക്കെതിരെ അപവാദ പ്രചാരണം നടത്തിയെന്നതിന്റെ പേരില്‍ സസ്പെന്‍ഷനിലായ കലിക്കറ്റ് സര്‍വകലാശാലയിലെ ജീവനക്കാരനായ സി. പ്രകാശനെ ജോലിയില്‍ തിരിച്ചെടുത്തു.

സംഭവത്തെ കുറിച്ച് സര്‍വകലാശാലയിലെ പരാതി കമ്മിറ്റിയുടെ റിപ്പോര്‍ട്ടിന്റെ അടിസ്ഥാനത്തില്‍ നടപടി സ്വീകരിക്കണമെന്ന് നേരത്തെ ഹൈക്കോടതി സര്‍വകലാശാലാ വൈസ് ചാന്‍സലറോട് ആവശ്യപ്പെട്ടിരുന്നു. പ്രകാശന്‍ കുറ്റക്കാരനല്ലെന്ന റിപ്പോര്‍ട്ടിന്റെ അടിസ്ഥാനത്തില്‍ വൈസ് ചാന്‍സലര്‍ സസ്പെന്‍ഷന്‍ പിന്‍വലിക്കുകയായിരുന്നു.

നേരത്തെ പരാതി കമ്മിറ്റിയുടെ റിപ്പോര്‍ട്ട് തീര്‍ത്തും പക്ഷപാതപരമാണെന്ന് ചൂണ്ടിക്കാട്ടി ഉഷ വൈസ് ചാന്‍സലര്‍ക്ക് നിവേദനം നല്‍കിയിരുന്നു.

കഴിഞ്ഞ മെയ് 21നാണ് പ്രകാശനെ സസ്പെന്റ് ചെയ്തത്. ബസില്‍ ഉഷയ്ക്ക് നേരിടേണ്ടി വന്ന പീഡനത്തിന്റെ പേരില്‍ യൂണിവേഴ്സിറ്റിയില്‍ അവര്‍ക്കെതിരെ അപവാദ പ്രചാരണം നടത്തിയെന്നായിരുന്നു ഉഷയുടെ പരാതി.