മുല്ല ഒമറിനെ പിടിച്ചു ?
ലണ്ടന്: മുല്ല ഒമര് പിടിയിലായെന്ന് അഭ്യൂഹം. താലിബാന് കാണ്ടഹാറിന്റെ നിയന്ത്രണം നഷ്ടമായ രാത്രിയില് മുല്ല ഒമറിനെയും തടവിലാക്കിയെന്ന് കരുതപ്പെടുന്നു. യാഥാസ്ഥിതികരോട് അനുഭാവമുളള ഒരു പട്ടാളമേധാവിയുടെ കസ്റഡിയിലാണത്രേ താലിബാന്റെ ആത്മീയ നേതാവ്.
കാണ്ടഹാറിലെ ഒരു ഗോത്രസൈന്യത്തിന്റെ കമാന്ഡര് ഖാലിദ് പഷ്തൂണിനെ ഉദ്ധരിച്ച് ബ്രിട്ടീഷ് പത്രങ്ങള് റിപ്പോര്ട്ടു ചെയ്തതാണ് ഈ വിവരം. വാര്ത്ത പെന്റഗണ് സ്ഥിരീകരീച്ചിട്ടില്ല.
ഒമര് ഇപ്പോള് സൗഹാര്ദ്ദപരമായ അന്തരീക്ഷത്തിലാണ് കഴിയുന്നതെന്നും, എന്നാല് പുതിയ അഫ്ഗാന് സര്ക്കാരിനു അദ്ദേഹത്തെ വിട്ടു കൊടുക്കണോ എന്ന് ഗോത്രസഭ തീരുമാനിക്കുമെന്നും ഖാലിദ് പഷ്തൂണ് പറഞ്ഞു.
പുതിയ സര്ക്കാര് ഒമറിന് രക്ഷപെടാന് അവസരമൊരുക്കുമെന്ന അഭ്യൂഹങ്ങള് ഇതോടെ അവസാനിച്ചതായി നിരീക്ഷകര് കരുതുന്നു.
ജീവനോടെയോ അല്ലാതെയോ ബിന് ലാദനെ പിടിക്കാനുളള ഉത്തരവ് ഒമറിനും ബാധകമാണോയെന്ന ചോദ്യത്തിന് പ്രോസിക്യൂഷന് നടപടികളില് നീതി ഉറപ്പു വരുത്തുമെന്ന് അദ്ദേഹം മറുപടി നല്കി. ഭീകരര്ക്ക് അഭയം നല്കിയവരെയും നിയമത്തിനു മുന്നില് കൊണ്ടു വരും. മുല്ല ഒമറിനും അത് ബാധകമാണ്. അദ്ദേഹം പറഞ്ഞു.