കാതോലിക്കബാവ വിളിച്ച യോഗത്തില് പാത്രിയര്ക്കീസ് പങ്കെടുത്തില്ല
കോട്ടയം: മലങ്കര യാക്കോബായ, ഓര്ത്തഡോക്സ് സഭയില് യോജിച്ച് തിരഞ്ഞെടുപ്പ് നടത്തുന്നതിന് ബസേലിയോസ് മാര്തോമാ മാത്യൂസ് ദ്വിതീയന് കാതോലിക്കാ ബാവ വിളിച്ചു ചേര്ത്ത യോഗത്തില് പാത്രിയര്ക്കീസ് വിഭാഗം പങ്കെടുത്തില്ല.
ഡിസംബര് എട്ട് ശനിയാഴ്ച ഉച്ചയ്ക്ക് ശേഷം മൂന്ന് മണിക്ക് കോട്ടയം ദേവലോകം കാതോലിക്കേറ്റ് അരമനയിലാണ് കാതോലിക്കാ ബാവ യോഗം വിളിച്ചത്. ഓര്ത്തഡോക്സ് വിഭാഗത്തിലെ 20 ബിഷപ്പുമാരെയും പാത്രിയര്ക്കീസ് വിഭാഗത്തിലെ ഒമ്പത് ബിഷപ്പുമാരെയുമാണ് യോഗത്തിന് ക്ഷണിച്ചിരുന്നത്.
എന്നാല് കാതോലിക്ക ബാവയുടെ ക്ഷണസന്ദേശത്തിലെ പല പരാമര്ശങ്ങളും സുപ്രിം കോടതി വിധിയുടെ ലംഘനമാണെന്ന് ചൂണ്ടിക്കാട്ടി പാത്രിയര്ക്കീസ് വിഭാഗത്തിന് വേണ്ടി ശ്രേഷ്ഠ നിയുക്ത കാതോലിക്കാ ബാവ മാര് ദിവന്യാസിയോസ് മറുപടിയായി ഫാക്സ് സന്ദേശം അയച്ചു. കാതോലിക്ക ബാവയുടെ കല്പനയിലെ മലങ്കര മെത്രാപോലീത്തയെന്നും പരിശുദ്ധ തോമാശ്ലീഹായുടെ സിംഹാസനത്തില് ആരൂഢനായിരിക്കുന്നതെന്നുമുള്ള വിശേഷണങ്ങള് അംഗീകരിക്കാവില്ലെന്ന് മറുപടിയില് വ്യക്തമാക്കി.
സുപ്രിം കോടതി വിധി പ്രകാരം തിരഞ്ഞെടുപ്പ് നടത്തുന്നതിന് ഏറെ ബുദ്ധിമുട്ടുകളുണ്ടെന്ന് ഇതോടെ വ്യക്തമായി. അതേ സമയം തിരഞ്ഞെടുപ്പ് നടത്തുന്നതിന് സുപ്രിം കോടതി നിയോഗിച്ച നിരീക്ഷകന് വി. എസ്. മളീമഠ് ഡിസംബര് 11ന് ഇരുവിഭാഗങ്ങളുടെയും യോഗം വിളിച്ചിട്ടുണ്ട്.