ലാദന്റെ മരണം ടിവിയില്‍ കാണിക്കുമെന്ന് ഭാര്യ

ദില്ലി: യുഎസ് സേന പിടികൂടും മുമ്പെ ഒസാമ ബിന്‍ ലാദന്‍ മരണം വരിക്കുമെന്ന് ലാദന്റെ ഭാര്യമാരിലൊരാളായ സബിഹ അറിയിച്ചു.

ലാദനെ അദ്ദേഹത്തിന്റെ മൂത്ത മകന്‍ കൊല്ലും. ആ ദൃശ്യം അല്‍-ജസീറ ടിവിയില്‍ സംപ്രേഷണം ചെയ്യാനാണ് ലാദന്റെ ഉദ്ദേശ്യമെന്നും സബിഹ പറഞ്ഞു. ജിഹാദ് നടത്തുന്നവര്‍ക്ക് പുതു ജീവന്‍ നല്‍കാനും രക്തസാക്ഷിത്ത്വ പരിവേഷം നേടാനുമാണിത്.

ബ്രിട്ടീഷ് പത്രമായ ദ ഡെയിലി റെക്കോര്‍ഡ് ആണ് ലാദന്റെ ഭാര്യയുടെ പ്രസ്താവന റിപ്പോര്‍ട്ട് ചെയ്തത്. ലാദന്‍ രക്തസാക്ഷിത്വം വരിക്കുന്നതോടെ അത് തീവ്രവാദ പ്രവര്‍ത്തനത്തിന്റെ പുതിയ ഘട്ടത്തിന്റെ തുടക്കമാവും. വാഷിംഗ്ടണിലെ കാപിറ്റോള്‍, ലണ്ടനിലെ ബിഗ് ബെന്‍, പാരിസിലെ ഈഫല്‍ ടവര്‍ എന്നിവ തകര്‍ക്കുകയാണ് അല്‍-കെയ്ദയുടെ ലക്ഷ്യം.

ശത്രുസൈന്യങ്ങള്‍ക്കെതിരെ പോരാടാന്‍ അല്‍-കെയ്ദ അംഗങ്ങളുടെ ഭാര്യമാരോട് ലാദന്‍ ആഹ്വാനം ചെയ്തതായി മറ്റൊരു ബ്രിട്ടീഷ് പ്രസിദ്ധീകരണമായ ദി സണ്‍ റിപ്പോര്‍ട്ട് ചെയ്തു. തങ്ങളുടെ ആയുധങ്ങള്‍ ഭാര്യമാര്‍ക്ക് നല്‍കാനായി ലാദന്‍ ഉത്തരവിട്ടിട്ടുണ്ടെന്നാണ് സണ്‍ റിപ്പോര്‍ട്ടില്‍ പറയുന്നത്.