കേരളത്തിലെ ഹോട്ടല്‍ മേഖലയില്‍ വന്‍മുതല്‍മുടക്ക്

കൊച്ചി : ഹോട്ടല്‍ മേഖലയിലെ അതികായന്‍മാരായ ഒബറോയ്-ടാജ് ഗ്രൂപ്പുകള്‍ കേരളത്തില്‍ വന്‍മുതല്‍മുടക്കിന് തയ്യാറാവുന്നു. സര്‍ക്കാരിന്റെ വിനോദ സഞ്ചാര മേഖലയോടുളള സൗഹാര്‍ദ്ദസമീപനമാണ് കമ്പനികളെ കേരളത്തിലേയ്ക്ക് ആകര്‍ഷിക്കുന്നത്.

കെടിഡിസിയുമായി സഹകരിച്ച് ഒബറോയി പാതിരാമണലിലും ബേക്കലിലും ഹോട്ടല്‍ പ്രോജക്ടുകള്‍ ആരംഭിച്ചു കഴിഞ്ഞു. രണ്ടിടത്തുമായി 120 മുറികള്‍ കൂടുതല്‍ നിര്‍മ്മിക്കാനാണ് ശ്രമം. പദ്ധതി പൂര്‍ത്തിയായി കഴിഞ്ഞാല്‍ രാജസ്ഥാനു ശേഷം ഒബറോയിക്ക് ഏറ്റവുമധികം നിക്ഷേപമുളള സംസ്ഥാനമാവും കേരളം.

ടാജ് നിക്ഷേപസാദ്ധ്യതകള്‍ വീക്ഷിച്ചു വരികയാണ്. വെല്ലിംഗ്ടണ്‍ ഐലന്റിലെ ടാജ് മലബാര്‍ മോടിപിടിപ്പിക്കാന്‍ ഇപ്പോള്‍ത്തന്നെ കമ്പനി 22 കോടി ചെലവാക്കി. കുമരകം റിസോര്‍ട്ടും പുതുക്കാന്‍ പദ്ധതിയുണ്ടെന്ന് ടാജ് ഗ്രൂപ്പിന്റെ സീനിയര്‍ വൈസ് പ്രസിഡന്റ് അജോയ് കെ. മിശ്ര പറഞ്ഞു.

കേരളത്തെ പ്രധാന ടൂറിസം കേന്ദ്രമായി വികസിപ്പിക്കുന്ന കാര്യം തങ്ങള്‍ ഗൗരവമായി പരിഗണിക്കമെന്ന് അദ്ദേഹം പറഞ്ഞു. ലോകവിനോദസഞ്ചാര ഭൂപടത്തില്‍ കേരളത്തിന്റെ സ്ഥാനം ഉറപ്പിക്കാന്‍ സര്‍ക്കാരുമായി സഹകരിച്ച് പ്രവര്‍ത്തിക്കും.