ചേകന്നൂര് : സുപ്രീം കോടതിയെ സമീപിക്കും
കൊച്ചി : ചേകന്നൂര് മൗലവിയുടെ കൊലയാളികളെ അറസ്റു ചെയ്യണമെന്നാവശ്യപ്പെട്ട് സുപ്രീം കോടതിയെ സമീപിക്കുമെന്ന് ആക്ഷന് കമ്മിറ്റി. അന്വേഷണം ത്വരിതപ്പെടുത്താന് സിബിഐയ്ക്ക് നിര്ദ്ദേശം നല്കണമെന്നും അവര് ആവശ്യപ്പെടുന്നു.
ആക്ഷന് കമ്മിറ്റി ചെയര്മാന് കെ.പി.ഓ.റഹ്മത്തുളള വാര്ത്താസമ്മേളനത്തില് അറിയിച്ചതാണ് ഇക്കാര്യം. ഡിസംബര് 20നു ചേരുന്ന യോഗത്തില് ഭാവി നടപടികള് തീരുമാനിക്കും. ജസ്റിസ് വി.ആര്,കൃഷ്ണയ്യരാണ് യോഗം ഉദ്ഘാടനം ചെയ്യുന്നത്.
ചേകന്നൂര് കൊല ചെയ്യപ്പെട്ടതാണെന്നതില് തര്ക്കമില്ല. എന്നാല് അജ്ഞാത കാരണങ്ങളാല് സിബിഐ അന്വേഷണം വൈകിക്കുകയാണെന്ന് ചെയര്മാന് ആരോപിച്ചു.
മുസ്ലീം മതപണ്ഡിതനായിരുന്ന ചേകന്നൂരിനെ 1993 ജൂലായ് 29നാണ് കാണാതായത്. മലപ്പുറം ജില്ലയിലെ ഇടപ്പാളിലുളള വീട്ടില് നിന്നും അദ്ദേഹത്തെ തട്ടിക്കൊണ്ടു പോയി കൊലപ്പെടുത്തിയെന്നാണ് ആരോപണം.
ലോക്കല് പോലീസും പിന്നീട് ക്രൈംബ്രാഞ്ചും അന്വേഷിച്ച കേസ് ഇപ്പോല് സിബിഐയുടെ കൈവശമാണ്. മൗലവിയെ കൊലപ്പെടുത്തി എന്നാരോപിച്ച് ഏതാനും പേരെ അറസ്റു ചെയ്യുകയും ചെയ്തു. എന്നാല് പ്രധാന പ്രതികളെ പിടികൂടിയിട്ടില്ലെന്ന് റഹ്മത്തുളള ആരോപിച്ചു