കണ്ടല് കാടിന്റെ സംരക്ഷണത്തിന് കേന്ദ്രസഹായം
കണ്ണൂര് : കേരളത്തില് കണ്ടല് വനങ്ങളുടെ സംരക്ഷണത്തിന് കേന്ദ്രം പണം അനുവദിക്കും. ഇതു സംബന്ധിച്ച് വിശദമായ പദ്ധതി രേഖ സമര്പ്പിക്കാന് സംസ്ഥാന വനം വകുപ്പിന് രണ്ടുമാസത്തെ സമയമനുവദിച്ചു. കേന്ദ്ര വനംവകുപ്പ് സെക്രട്ടറി പി.വി.ജയകൃഷ്ണന് അറിയിച്ചതാണ് ഈ വിവരം.
സംസ്ഥാനത്തെ കണ്ടല് മേഖലകള് സംരക്ഷിക്കണമെന്ന് ആവശ്യപ്പെട്ട് നിരവധി പരിസ്ഥിതി സംഘടനകള് കേന്ദ്ര സെക്രട്ടറിയെ സന്ദര്ശിച്ചിരുന്നു. സംസ്ഥാനം സമര്പ്പിക്കുന്ന റിപ്പോര്ട്ടനുസരിച്ച് അനുഭാവ പൂര്ണ്ണമായ നടപടികള് കേന്ദ്രം കൈക്കൊളളുമെന്ന് അദ്ദേഹം സംഘടനകളെ അറിയിച്ചു.
കണ്ടല്, മുളങ്കൂട്ടങ്ങള് എന്നിവ സംരക്ഷിക്കാന് നിലവിലുളള നിയമങ്ങള് ശക്തിപ്പെടുത്തും. സ്വകാര്യവ്യക്തികളില് നിന്നും കണ്ടല് മേഖലകള് ഏറ്റെടുക്കാനും കേന്ദ്രത്തിന് ഉദ്ദേശമുണ്ട്.
ചതുപ്പു നിലങ്ങളെയും കണ്ടല്വനങ്ങളെയും സംരക്ഷിക്കാന് നടപടിയെടുക്കണമെന്ന് കേരള ശാസ്ത്ര സാഹിത്യ പരിഷത്തടക്കമുളള പരിസ്ഥിതി സംഘടനകള് ആവശ്യമുന്നയിച്ചിരുന്നു.