മദ്യനയം: യുഡിഎഫ് യോഗം ചൊവാഴ്ച

തിരുവനന്തപുരം: ഡിസംബര്‍ 18 ചൊവാഴ്ച ചേരുന്ന യുഡിഎഫ് നേതൃയോഗത്തില്‍ സംസ്ഥാന സര്‍ക്കാര്‍ സ്വീകരിക്കേണ്ട മദ്യനയത്തെ കുറിച്ച് ചര്‍ച്ച ചെയ്യും.

കള്ള് ഷാപ്പുകളുടെ ലൈസന്‍സ് വ്യക്തികള്‍ക്ക് ഒറ്റക്കൊറ്റയ്ക്ക് നല്‍കണമെന്ന കെപിസിസി ശുപാര്‍ശ യോഗം ചര്‍ച്ച ചെയ്യും. കോണ്‍ഗ്രസും ജെഎസ്എസും ഒഴികെയുള്ള യുഡിഎഫിലെ ഒരു കക്ഷിയും ഈ നിര്‍ദേശത്തോട് യോജിക്കുന്നില്ല. അതുകൊണ്ടുതന്നെ ഈ നിര്‍ദേശം യുഡിഎഫ് അംഗീകരിക്കാനുള്ള സാധ്യത കുറവാണ്.

ക്രിസ്ത്യന്‍ മേലധ്യക്ഷന്മാരും വിവിധ സാമൂഹിക സംഘടനകളും ഈ കെപിസിസി ശുപാര്‍ശക്കെതിരെ രംഗത്തു വന്നിട്ടുണ്ട്. കോണ്‍ഗ്രസിലെ ഒരു വിഭാഗവും കെപിസിസി നിര്‍ദേശത്തിനെതിരെ പരസ്യമായി രംഗത്തുവന്നിട്ടുണ്ട്. ഇതിനിടെ ഇക്കാര്യത്തില്‍ മുഖ്യമന്ത്രി തീരുമാനമെടുക്കണം എന്ന നിര്‍ദേശവുമായി കരുണാകരന്‍ മുന്നോട്ടുവന്നിരിക്കുകയാണ്.

സര്‍ക്കാര്‍ അധികാരമേറ്റിട്ട് ആറ് മാസത്തിലേറെയായിട്ടും കള്ള്ഷാപ്പുകളെ കുറിച്ച് വ്യക്തമായൊരു തീരുമാനമെടുക്കാന്‍ കഴിയാത്തത് സര്‍ക്കാരിന്റെ പിടിപ്പുകേടായാണ് ചൂണ്ടിക്കാണിക്കപ്പെടുന്നത്.