ഇന്ത്യ പ്രത്യാക്രമണം നടത്തരുത്: പവല്‍

വാഷിംഗ്ടണ്‍: പാര്‍ലമെന്റിന് നേരെ നടന്ന ആക്രമണത്തിന്റെ വെളിച്ചത്തില്‍ അതിര്‍ത്തിയിലെ തീവ്രവാദി ക്യാമ്പുകള്‍ ആക്രമിക്കാന്‍ ഇന്ത്യ മുതിരുന്നത് കൂടുതല്‍ അപകടകരമായ സാഹചര്യം സൃഷ്ടിക്കുമെന്ന് യുഎസ് സ്റേറ്റ് സെക്രട്ടറി കോളിന്‍ പവല്‍.

തീവ്രവാദികള്‍ക്കെതിരെ തിരിച്ചടിക്കാന്‍ ഇന്ത്യക്ക് അവകാശമുണ്ടെങ്കിലും അത് സൂക്ഷിച്ചുവേണം. ഇന്ത്യയും പാക്കിസ്ഥാനും ആക്രമണത്തിന്റെ പാതയിലെത്തുന്നത് കൂടുതല്‍ പ്രശ്നങ്ങള്‍ക്ക് വഴിവെക്കും.

ഇന്ത്യന്‍ പാര്‍ലമെന്റിനു നേരെ നടന്ന ആക്രമണത്തെ പാക്കിസ്ഥാന്‍ പ്രസിഡന്റ് പര്‍വേസ് മുഷാറഫ് അപലപിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി. ആക്രമണത്തിന് പിന്നില്‍ പ്രവര്‍ത്തിച്ച രണ്ട് സംഘടനകള്‍ക്കെതിരെ മുഷാറഫ് നടപടി സ്വീകരിക്കുന്നുമുണ്ട്.

തീവ്രവാദത്തിനെതിരായ പോരാട്ടത്തില്‍ ഇരു രാജ്യങ്ങളെയും യുഎസ് പ്രോത്സാഹിപ്പിക്കുന്നുണ്ട്. പക്ഷേ അത് നിയന്ത്രണത്തിനപ്പുറം പോകരുത്.

പാക്കിസ്ഥാന്‍ സര്‍ക്കാരിന്റെ പ്രതികരണമെന്തെന്ന് അറിയാന്‍ കാത്തിരിക്കാന്‍ തയ്യാറാണെന്ന് പ്രധാനമന്ത്രി വാജ്പേയി വ്യക്തമാക്കിയിട്ടുണ്ടെന്ന് പവല്‍ ചൂണ്ടിക്കാട്ടി.