ഡിസിസി പുന:സംഘടന: തര്‍ക്കം തുടരുന്നു

തിരുവനന്തപുരം: ഡിസിസികളുടെ പുന:സംഘടന സംബന്ധിച്ച ഗ്രൂപ്പുതര്‍ക്കത്തില്‍ സോണിയാഗാന്ധി ഇടപെട്ടേക്കുമെന്നറിയുന്നു. കേരളത്തിലെ കോണ്‍ഗ്രസിനകത്തുള്ള നാലുഗ്രൂപ്പുകളും തമ്മിലുള്ള തര്‍ക്കം മൂത്ത അവസ്ഥയിലാണ് പ്രശ്നപരിഹാരത്തിന് സോണിയ ഇടപെടണമെന്ന ആവശ്യം ശക്തമായിരിക്കുന്നത്.

90 സ്ഥാനങ്ങല്‍ ഐ ഗ്രൂപ്പിനും 85 സ്ഥാനങ്ങള്‍ എ ഗ്രൂപ്പിനും നല്കാന്‍ ഏകദേശധാരണയായിട്ടുണ്ട്. പക്ഷെ അതുപോരെന്നാണ് കരുണാകരന്‍ ശഠിക്കുന്നത്.നിലവില്‍ 89 സ്ഥാനങ്ങളാണ് ഐ ഗ്രൂപ്പിനുള്ളത്. എ ഗ്രൂപ്പിന് 59സ്ഥാനങ്ങളേ ഇപ്പോഴുള്ളൂ. അതുകൊണ്ടാണ് തങ്ങളുടെ സംഖ്യകൂട്ടിക്കിട്ടണമെന്ന് കരുണാകരന് വാശി.

രമേഷ് ചെന്നിത്തലയുടെ മൂന്നാംഗ്രൂപ്പും വയലാര്‍രവിയുടെ നാലാംഗ്രൂപ്പും തൃപ്തരല്ല. ഇവര്‍ക്ക് യഥാക്രമം 23ഉം 14ഉം സ്ഥാനങ്ങള്‍ നല്കണമെന്നാണ് ആദ്യം ആലോചിച്ചിരുന്നത്. പക്ഷെ വയലാര്‍ രവിയ്ക്ക് അത് സ്വീകാര്യമായിട്ടില്ല. 14ല്‍ നിന്ന് തങ്ങളുടെ പ്രാതിനിധ്യം ഇനിയും ഉയര്‍ത്തണമെന്നാണ് രവിയുടെ വാദം. വയലാര്‍ രവി ഇക്കാര്യം ചൂണ്ടിക്കാട്ടി സോണിയയ്ക്ക് കത്തെഴുതിയതായും പറയുന്നു.

ആകെ 14 ജില്ലകളിലേക്കായി 224 ഭാരവാഹികളെയാണ് നിശ്ചയിക്കേണ്ടത്. വയലാര്‍രവിയുടെയും കരുണാകരന്റെയും അസംതൃപ്തികള്‍ പരിഹരിക്കാന്‍ സോണിയതന്നെ ഇടപെട്ടേക്കുമെന്നാണ് അറിയുന്നത്.